Guwahati, Jylliew:
Ka Guwahati Police Commissionerate ka la pynbna ïa ki lad pahara ba kyrpang ha kylleng ki jaka leh eksamin na ka bynta ka National Eligibility cum Entrance Test (NEET-UG) 2026, kaba la buh ban pynlong ha ka 21 tarik u Jylliew, ryngkat bad ki hukum bapyrkhing ba kin dang treikam hajan baroh ki jaka ba la buh kyrpang ha kylleng ka nongbah.
La pynmih katkum ka kyndon 163 jong ka Bharatiya Nagarik Suraksha Sanhita (BNSS), 2023, kane ka jingbthah ka buh ïa ka jaka ba la khang pyrshah kaba jrong 100 meter na kawei pa kawei na ki 15 tylli ki jaka leh eksamin NEET ha Guwahati.
Kane ka sienjam ka long ban ïada ïa ka jinglong ba janai jong ka eksamin rung doktor bad ban pynthikna ïa ka jingïaid beit bad kaba shai jong ka.
Katkum ka hukum ba la soi da u Deputy Commissioner of Police (Administration) u Nirupam Hazarika, ka jingïoh rung sha ki jaka ba la khang kan long tang ïa ki nongthoh eksam kiba rah ïa ki Admit Card kiba biang, ki briew kiba leh eksamin, ki pulit kiba don ha ka kam bad ki heh sorkar ba la ai bor kiba ïadei bad ka rukom thoh eksamin.
Ïa ki jingpyrkhing la wanrah kum ka lad jingïada na kano kano ka jingpyrshang ban pynsuk ïa ki kam bymman, khamtam lyngba ki lad pyntip Digital bad ki lad pyntip paidbah.
Ki bor pynïaid ki la ong ba ki jingpyrkhing ki long ban khanglad ïa ki kam kiba lah ban pynthut ïa ka jinglong hok jong ka eksamin.
Ki jaka thoh eksamin kiba la shah ktah ki kynthup ïa ka Dispur College, PM Shri Kendriya Vidyalaya CRPF Amerigog, Krishna Kanta Handiqui State Open University, Kendriya Vidyalaya Khanapara, Kendriya Vidyalaya Adarsha Colony, Pragjyotish College, Arya Vidyapeeth College, KC Das Commerce College, KV IOC Noonmati, PM Shri KV Narangi, Cotton University, Handique Girls’ College, B. Borooah College, Guwahati College bad Guwahati Commerce College.
Ki heh pulit ki la ïathuh ba kane ka hukum kan treikam tang ha ka sngi ba pynlong ïa ka eksamin bad la thmu ban pynneh ïa ka jinglong jingman ha kylleng ki jaka eksamin katba dang pynduna ïa ka jingma na ki jingpynthut ne ki jingïakren kiba ïadei bad ka jingkynnoh ba la pyndonkam ïa ki lad ki lynti bym hok.
Ki bor pynïaid ki la maham ruh ba kano kano ka jingpynkheiñ ïa ka kyndon pyrkhing kan sa ïalam ban shah pynngat ha ka aiñ katkum ka kyndon 223 jong ka Bharatiya Nyaya Sanhita (BNS), 2023.
