Jowai, Jylliew 18
Ka lympung ïalehkai District Level Inter School Subroto Mukherjee Cup Football Tournament 2026 ba la pynlong da ka shlem treikam jong u District Sports Officer, West Jaiñtia Hills District ka la sdang ha ka 16 tarik mynta u bnai ha madan Wahïajer Multi Sports Complex bad Wahïajer Mini Stadium.
Ha kane ka lympung la wan shim bynta haduh 68 tylli ki skul hapoh ka District kynthup 31 tylli ki skul ha ka Under-17 ki shynrang, 12 tylli ha ka Under-17 ki kynthei bad 25 tylli ha ka Under-15 Boy ki shynrang.
Ha ka jingïalehkai jong ka Under-17 boys kaba la long ha ka sngi Palei ha madan Wahïajer Multi Sports Complex, ka Riwar Jaiñtia C.O.G Secondary School, Ladjaplem ka la pynliem noh ïa ka Jowai Govt. Upper Primary RMSA School da 1-0 kol.
Kumjuh ka Wahïajer Presbyterian HSS ka la pynliem noh ïa ka Ïalong SS da 3-0. Ka Nongtalang Govt. HSS ka la jop da 6-5 kol lyngba ka tie-breaker ïa ka Moodymmai SS.
Katba ka Lissi Pearl HSS, Khliehtyrshi ka la jop haduh 9-1 kol pyrshah ïa ka Jowai District Pres. School, Ïalong. Ka St Francis SS, Mowkyndeng ka la pynliem noh ïa ka Jaiñtia HSS lyngba ka tie-breaker da 4-3 kol.
Ha ka jingïakhun jong ka Under-15 Boy kaba la long ha Wahïajer Mini Stadium, ka St. Claret HSS ka la pynrem da 1-0 kol ïa ka On and On English School. Ka All Saint SS ka la jop da 2-0 kol ïa ka Wahïajer Govt. UPS.
Ka Padu SS ka la pynliem da 3-0 kol ïa ka Ïalong SS, katba ka Lirian English School Umsalait ka la jop da ka Walkover (1-0 kol) ïa ka Adventist HSS, ka bym shym la wan mih madan. Ka Jaiñtia HSS ka la pynliem noh ïa ka Achievers HSS lyngba ka tie-breaker da 3-1 kol.
