Shillong, Jylliew 18
U Harry Kane u la lah ban pynsah nam ïalade ha ka jingïalehkai kaba nyngkong jong ka England ha ka lympung ïalehkai FIFA World Cup pyrshah ïa ka Croatia, ha kaba u la kylla long u rangïalehkai uba la thep bun tylli ki penalty ha ka World Cup.
Une u kapten jong ka England u la poi sha kane ka thong ha ka jingjop jong ka kynhun jong u da 4-2 kol, da kaba tam ïa u khlur ïalehkai ba paw ka Argentina u Lionel Messi bad u Gabriel Batistuta, kiba la bat mynshwa ïa kane ka rekod da kaba thep mar saw tylli ki penalty.
Ka England ka la sdang ïa ka jingïalehkai jong ka pyrshah ïa ka Croatia ha ka jingïakhun kaba khadsan jong kane ka lympung ïalehkai ha Dallas Stadium kaba ha Arlington. Te kumta u Kane u la lah ban pynpaw ïa ka jingtbit na ka bynta ka England ha kaba u la thep ïa ka kol kaba nyngkong lyngba ka penalty ha ka minit kaba 12.
Ka jingpyrshang ba nyngkong jong une u rangïalehkai shakhmat ka la shah khanglad noh ha u nongapkol ka Croatia, u Dominik Livakovic, hynrei u la ïoh da ka penalty hadien ba u la shah pynur ha u rangïalehkai ‘dien u Josko Gvardiol. Te kumta u Kane, um shym la pynlehnohei ïa kane ka kabu ksiar na ka bynta ban thep ïa ka kol kaba nyngkong jong kane ka kynhun.
Da ka jingïalehkai bha ka Croatia ka la lah ban pynïakhaid kylla hadien shiteng kynta lyngba u Martin Baturina (36) hadien ka jingïarap pynbuh da u Jordan Pickford ha kaba u rangapkol ka England um shym la lah ban khanglad na ka jingshah thep.
Hashwa ban kut ka kylla step ka England ka la bteng biang ha ka jingthep kol ha ka minit kaba 42 lyngba u Kane ha kaba u rangapkol ka Croatia um shym la lah ban khanglad. Kumjuh ka Croatia ka la lah ban pynïakhaid kylla hashwa ban wai artad ka kylla step lyngba u Petar Musa (45+5) na ka bynta ban ïakhaid mar 2-2 kol.
Hynrei ka England ka la lah ban ïalehkai bha hadien ba la sdang ïa ka jingïalehkai jong ka kylla miet ha kaba u Jude Bellingham u la ïoh ban thep ha ka minit kaba 47. Nangta u Marcus Rashford u la thep ïa ka kol kaba khatduh ha ka minit kaba 85 na ka bynta ban pynlong ïa kane ka kynhun jong u Gareth Southgate ban jop da 4-2 kol.
Ka penalty kaba nyngkong jong u Kane kam dei kaba ïarap tang ïa ka England ban khur ïa ki lai poiñ, hynrei ka la pynlong ïa u ban rung ha ka thup jong ki nongthep kol ba kynsai ha ka penalty. Ryngkat ka jinglong nongïalam ha ka ban thep kol bun tam ha ki penalty jong ka FIFA World Cup, une u kapten ka England u la lah ban pynïaryngkat ïalade bad ka rekod jong u Lionel Messi, uba la pyrshang ban thep bun lyngba ki penalty ha kane ka lympung.
Kumba ka paw u Kane u la lah ban thep 5 kol lyngba ki penalty ha ki jingïalehkai World Cup, ha kaba u la tam ïa u Messi bad u Batistuta, kiba la thep mar 4 kol.
