Shillong, Jylliew 19
Ka Shillong Cricket Association (SCA) ka la phah da ka shithi ban pan jingshai na ka BCCI lyngba ka Meghalaya Cricket Association ha kaba ïadei bad ka jingbat kam jong uwei na ki rangïalehkai kriket ba la paw na kane ka Jylla, u Mark Ingty.
Katkum u kyrwoh ba la soi da u President Bah Peter Mac Donald Kharsawian bad u Secretary Bah Banri Kharmalki, ki la kam ba na ka jingïoh lum jingtip jong ka, u Mark Ingty u bat ruh kum u Joint Secretary ka synjuk ïalehkai ka kriket jong ka West Karbi Anglong kaba pynïasoh bad ka Assam Cricket Association bad ba u dei ruh u nongjied ïa ki nongïalehkai (selector).
Katba hapoh ka synjuk jong ka Meghalaya Cricket Association (MCA), ka SCA ka pyntip ba u Mark Ingty u dei uwei na ki dkhot jong ka Apex Council.
Dei hadien kine ki jingïoh lum jingtip kiba tikna, ba ka pynlong ïa u Bah Mac Donald bad kumjuh u Bah Banri, ba kin pan jingshai na ka BCCI hato ka aiñ ne kyndon jong ka, ka shah ne em ïa u briew ba un lah ba un bat artylli ki kam na ka bynta ki ar tylli ki synjuk ïalehkai.
Kumta lyngba une u kyrwoh, kine ki arngut ki nongïalam ba hakhmat ka SCA, ki kwah ban ïoh jingshai kaba tikna na ka BCCI ba hato don aiñ ne em ban bat ar kam ha ki ar tylli ki synjuk, da kaba ki la kam ruh ba kane ka kyrwoh pan jingpynshai kam dei ba ki don kano kano ka jingthmu ba sha lyndet pyrshah ïa u Mark Ingty, hynrei ka shu long beit ban ïa shai la ka don ne em ka lad ne ka lynti ha ki aiñ ki kanun jong ka BCCI kaba shah ne ailad ïa uno uno u dkhot ban kit kam ha ki artylli ki synjuk kumba bat mynta da u.
