Aizawl, Jylliew:
U Myntri Rangbah ka Jylla Mizoram, u Lalduhoma ha ka sngi Balang, u la pyllait paidbah ïa 219 tylli ki kali pulit kiba dang thymmai hapoh ka jingtreikam jong ka Assistance to States and Union Territories for Modernisation of Police (ASUMP) Scheme 2025-26 at the 3rd Battalion MAP Parade Ground ha Mualpui, Aizawl.
Ha kane ka prokram la leit ban ïashim bynta da u K Sapdanga Myntri ka tnat ki kam pohïing ka ri, ki heh ophisar sorkar, ki ophisar bahakhliehduh jong ki pulit bad ki heh jong ki unit.
Katkum ka jingïathuh jong ki heh sorkar, ka tnad ki kam pohïing ka la mynjur ban thied ïa ki kali ha ka jinglut baroh kaba long T.33.83 klur, kynthup ïa ka bhah jong ka Central kaba T.30.45 klur bad ka jingnoh synñiang jong ka jylla kaba T.3.38 klur.
Ka kynhun ki kynthup ïa ki Scooter elektrik, ki thuk thuk, ki kali rit, ki kali heh bad ki kali pdeng, ki kali phatok, ki kali kit um, ki kali kiba lah ban shah kuli na ka bynta ka jingpahara VVIP bad ki kali kit kali na ka bynta ban pynïaid ïa ka leit ka wan bad ka jingkyrshan ha ka jingtreikam.
Ki heh sorkar ki la ïathuh ba ïa ki kali yn sam sha baroh 44 tylli ki thanat pulit, 15 tylli ki pulit outpost, ki kynhun pulit ba don tiar, ki kynhun ba kyrpang, ki bor pynïaid distrik bad ka Police Training School.
Hapoh ka State Action Plan na ka bynta u snem 2025-26, ka Mizoram ka la ïoh T.43.87 klur na ka bynta ban pynthymmai ïa ki pulit, kaba kynthup ïa ka jingthied ïa ki tiar pahara, ki tiar pulit kiba stad, ki tiar Forensic bad ki mar ki mata kiba lah ban pynkhih.
Ka sorkar ka la kdew ba ka jingthied kali hapoh ka prokram pynthymmai ïa ki pulit kam shym la shah naduh u snem 2017 bad ba ka jylla kam shym la ïoh ïa ka pisa na ka sorkar pdeng hapoh katei ka skhim naduh u snem 2021-22.
