Imphal, Jylliew:
Ki bor pahara ki la pynpra ïa ki 61 tylli ki lynti krem ba la tih be-aiñ bad pynpra ïa ki katto katne ki jaka talasi bym don jingbit ha kylleng ki jaka lum bad them jong ka Manipur ha ka jingpynkhreh kaba jur bha ha kine ki 36 kynta ba la dep, katkum ka khubor mynstep jong ki pulit ka Manipur ba la pynmih ha ka sngi Palei.
Ka jingkhynra kaba heh bha ka la kynthup ïa haduh 6,000 ngut ki briew kiba la pynlong ïa ki jingwad bniah ba ïatreilang, ka jingpynkhreh, bad ka jingïalehkai ban synshar ïa ki jaka ha ki jaka ba bun jait kiba sngewkhia ha kylleng ka jylla.
Ka bynta ba kongsan jong ka jingkhynra la pynleit jingmut ha ka thaiñ Leimakhong, kaba kynthup ïa ki shnong Leilon Vaiphei, Leilon Khunou, L. Munlui, bad ki shnong Konsakhul kiba don ha Kangpokpi distrik,.
Ha kane ka jingpyntreikam, ki bor pahara ki la pynpra ïa ki 30 tylli ki lynti krem, ki outpost bad ki jaka sah ba la buh ha ki jaka ba la kynnoh ba la pyndonkam da ki riew pyrshah ïa ka imlang sahlang.
Ka jingkhynra ka la pynlong ruh ban ïoh kurup ïa shibun ki tiar ïaleh bad ki tiar kiba ïadei bad ka kam shipai.
Ki tiar ba la ïoh kurup ki kynthup ïa 11 tylli ki suloi 12-bore single-barrel breech-loading (SBBL), 294 tylli ki kuli bym pat pyndonkam, 34 tylli ki kuli ba la dep pyndonkam, ar tylli ki song nar bad 6 tylli ki jaket ba lah ban ïada kuli.
La kem saw ngut ki briew ha ka por ba pynlong ïa ka jingkhynra bad mynta ki dang don ha ka jingpynshisha, la ïathuh ki heh sorkar.
Kane ka jingpyntreikam kaba dang shen, ka long hadien kitei ki juh ki jingpyntreikam, kiba la sdang ha ka 17 tarik, Jylliew.
Ha ka Saikul subdivision jong ka Kangpokpi district, ki bor pahara, ki la pynpra ïa saw tylli ki lyntri krem, kiba kynthup ïa ar tylli ha kawei pa kawei ka shnong jong ka Thingphai bad C. Kholen.
Katba ha ka Churachandpur distrik ba marjan, ki briew ki la pynpra ïa kawei ka lynti krem bad kawei ka jaka talasi ba khlem jingbit ha ki thaiñ S. Nabil bad Loilamkoi.
Ki bor synshar ki la ong ba kine ki jingtreikam ki dei shi bynta jong ka jingpyrshang kaba dang ïaid shakhmat ban pynphai biang ïa ka jinglong jingman bad ban pynkhlaiñ ïa ka aiñ da kaba weng noh ïa ki jingtei ba la ker kut be-aiñ bad ki jaka talasi ba la buh ha ki jaka ba don ki jingïakynad.
Kham hashwa, ha ka 16 tarik, Jylliew, ki bor pahara ki la pynpra ïa ki 26 tylli ki lynti krem beaiñ ha Ukhrul distrik kaba sngewkhia bha.
Katkum ka jingong jong ki heh sorkar, ïa kitei ki jingtei la tei da ki riew pyrshah ïa ka imlang sahlang kiba ïadei bad ki kynhun pyrshah Naga bad Kuki hapdeng ka jingïakynad kaba dang ïaid shakhmat ha katei ka thaiñ.
Ka jaka pahara ka la pyni ba kum kine ki jingtreikam kin dang bteng ha ki jaka ba don jingma ban khanglad ïa ki kam lehnoh bad ban pynthikna ïa ka jingshngaiñ jong ki paidbah.
