Shillong, Jylliew 21
U Myntri ka tnad kam ïada ri u Rajnath Singh u la ïashim bynta ha ka jingrakhe ïa ka 12th International Day of Yoga (IDY) ha kaba la wan shim bynta da kumba 1,000 ngut ki shipai suiñ bad shipai ryngkew ha Eastern Air Command Headquarters ha Shillong.
U Myntri Rangbah ka Jylla u Conrad K Sangma, u Chief of the Air Staff u Air Chief Marshal AP Singh, u Air Officer Commanding-in-Chief, Eastern Air Command Air Marshal Inderpal Singh Walia, bad u General Officer Commanding jong ki Headquarters 101 Area Lieutenant General Mohit Wadhwa ki la shim bynta ha ka Yoga ruh bad utei u Myntri ki kam ïada ri.
Haba ai jingkren sha ki lad pathai khubor, u Rajnath Singh u la pynpaw ba ka Yoga ka long kum ka saian bad ka rukom im kaba pynïasoh ïa ki briew bad ka mynsiem jong ki, ka imlang sahlang, ka mariang bad ka jinglong riw blei. U la bynrap ba ka yoga ka ai ka lynti sha ka jingsuk ka mynsiem, ka jingshai ha ka jingmut jingpyrkhat, bad ka jingskhem jingmut.
Haba pynpaw ha ka rynsan X, u Myntri ki kam ïada ri u la ai khublei ïa ki sienjam ba ïaineh bad ka jingïalam ba iohi jngai jong u Myntri Rangbahduh ka ri u Narendra Modi ban pynlong ïa ka Yoga kum ka jingïakhih ha ka pyrthei, kaba ai jingmyntoi ïa ka koit ka khiah ïa ki briew ha kylleng ka pyrthei. U la ban jur ba ka Yoga ka pyni ïa ka bor jong ki riti dustur hyndai jong ka India, kaba pynthikna ïa ka bha ka miat jong baroh ki briew. Te kumta u la kyrpad ïa ki paidbah ban pynlong ïa ka Yoga kum ka bynta kaba kongsan ha ka jingim jong ki kaba man ka sngi ban tei ïa ka met kaba koit ba khiah, ka jingmut jingpyrkhat kaba jai jai, bad ka ri kaba khlaiñ.
