Agartala, Jylliew:
U General Secretary ka CPI(M) u M.A. Baby ha ka sngi Thohdieng u la ong ba ka seng kan shim ïa ka jingbishar bniah ïalade ïa ki jingduna bad ki jingbakla jong ka kum shi bynta ban pynkhlaiñ ïa ka seng bad ban pynkhreh ïa ka elekshon ban wan.
Haba kren ha ki nongthoh khubor ha ka jingleit jong u sha Tripura na ka bynta ka jingïalang jong ka State Committee kaba ar sngi, u Baby u la ong ba ka seng ka la sdang ïa ka jingïakren halor ka jingpynkhreh ïa ka saiñ pyrthei bad ka seng na ka bynta ki jingïakhun elekshon ki ban sa wan.
“Ngi kam ba ki don ki jingduna bad ki jingbakla na ka liang jong ngi. Ngin sa bishar bniah hi dalade ïa ki jingduna bad ki jingbakla jong ngi bad ngi dang don ha ka jingpynbeit ban pynbeit ïa ki,” u la ong.
Ha kaba ïadei bad ka jingïaid lynti jong ka seng ha ka elekshon, u Baby u la kam ba ka Left Front ba la ïalam da ka CPI(M) ka la mad ïa ki jingshah rem ha kine ki snem ba la dep bad ong ba ka seng ka dang bishar bniah ïa ki daw kiba pynlong ïa ka ban wanphai biang ha ka bor synshar.
U la pynskhem ba ka kynhun Left ka dang lah ban ai ka lad saiñ pyrthei kaba lah ban ngeit, da kaba kdew ïa ka jingshem jong ki sorkar Left ha Kerala, West Bengal bad Tripura.
U Baby u la pynpaw ïa ki jingjop jong ka sorkar Left Democratic Front (LDF) ha Kerala, da kaba kam ba kane ka jylla ka la kiew bha ha kaba ïadei bad ka jingduk ba palat pud ha ka por ba synshar ka Left.
