Shillong, Jylliew 21
Ka Germany ka la bteng ïa ka jingjop kaba ar ha ka lympung ïalehkai FIFA World Cup, hadien b aka la pynliem noh ïa ka Ivory Coast da 2-1 kol ha ka step jong ka sngi U Blei ha Toronto, Canada bad ka la lah ban pynthikna ban jam sha kawei pat ka wat jingïakhun kaba 32.
Kane ka la wan lyngba ki ar kol ba la thep da u Deniz Undav, kiba u la lah ban pynphai ha ka kylla miet na ka bynta ban pynlong ïa ka Germany ban kamai 6 poiñ na ki ar sien ïakhun bad ban bat ïa ka kyrdan ba hakhlieh ha ka Group-E
Ka Germany kaba la bat ïa ka nam lahduh haduh saw sien, ka la wanphai biang da ka jing-khlaiñ bor hadien ba kam shym la lah ban ïalehkai bha ha u snem 2018 bad 2022, katba ka Ivory Coast ka dangïai khmih lynti ban jam sha kawei pat ka wat jingïakhun (knockout stage) bad mynta ka dangdon jingkyrmen ban ïoh rung.
Ha kawei pat ka jingïakhun ong ka Group-F, ka Japan ka la lah ban pynpaw ïa ka jingtbit na ka bynta ban pynliem noh ïa ka Tunisia da 4-0 kol ha Estadio Monterrey.
Kane ka jingjop ym tang ba ka la pynïoh jingkyrmen ïa katei ka kynhun ban jam sha kawei pat ka wat jingïakhun, hynrei ka la pynsah kynmaw ba kan dei ka sien kaba 1000 sien ban ïalehkai ha ka FIFA World Cup.
Tang mar ïasdang ka jingïalehkai, kane ka kynhun ba khlaiñ bor na ka dewbah Asia ka la ïoh ban pynkhih jar ha ka minit kaba 4 lyngba u Daichi Kamada. Kane ka la wan urlong lyngba u Keito Nakamura uba la rah ïa ka bol hajan ka ‘box’ na ka bynta ban pynbuh ïa u Kamada, u bym shym la pynlehnohei ïa kane ka kabu ksiar da kaba shut najan. Kane ka shi kol ka la long kaba nyngkong eh jong ka Japan ha ka World Cup
Ka Tunisia ka la sdang ban ïakynduh jingeh n aka daw ka jingtbit ki rangïalehkai ka Japan kiba la ïakhun tyngeh haduh kaba kut jong ka kylla step. U rangapkol ka Tunisia u Aymen Dahmen u la lah ban pyllait na ka jingshah thep ha u Ayase Ueda.
Hadien shiteng kynta ka Japan ka la ïoh ïa ka kabu kaba biang eh ban thep ïa ka kol kaba ar lyngba u Ueda na ka bynta ban tam da 2-2 kol ha ka kylla step.
Hadien katto katne por ba la bteng ïa ka kylla miet, ka Japan ka la thep biang ïa ka kol lyngba u Junya Ito ha ka minit kaba 69 hadien ba u rangïalehkai ‘dien ka Tunisia u Mohamed Amine Ben Hamida um shym la lah ban khanglad na ka jingshah thep.
Hashwa ban kut ka jingïalehkai u Ueda u la thep biang ïa ka kol kaba ar ka jong u ha ka minit kaba 83. Kane ka long ka sien kaba ar ba utei u rangïalehkai u la long uba nyngkong eh na Japan ban thep marwei ar kol tang ha kawei ka jingïalehkai World Cup.
Lyngba kane ka jingjop kaba nyngkong ïa ka Japan, ka la don jingkyyrmen ban jam sha kawei pat ka wat jingïakhun, hynrei ka donkam ban khur jngjop ha ka jingïalehkai kaba khatduh pyrshah ïa ka Sweden. Katba ka jingïaid lynti ka Tunisia ka la poi sha kaba kut ha kane ka lympung namar ka la shah rem ar sien ha kane ka lympung.
