Imphal, Jylliew:
Ka kynhun jong ka Shiv Sena, kaba la ïalam da u Eknath Shinde, ka la pynbna ïa ka jingthmu ban pynïeng kyrtong ha palat 35 tylli ki konstitwensi, ha kane ka elekshon sha ka ïing dorbar thawaiñ jong ka jylla Manipur, ka ban long ha u bnai Rymphang, jong u snem ban wan.
Ïa kane ka jingpynbna la pynbna da u president ka Shiv Sena Manipur unit u M. Tombi Singh ha ka jingïalang bad ki nongthoh khubor ha ka sngi Thohdieng, ha kaba u la batai ïa ka buit elekshon jong ka seng bad ki jingthmu pyntreikam ha ki kam saiñ pyrthei na ka bynta kane ka jylla.
“Ngin sa pynïeng palat 35 ngut ki kyrtong ha ka elekshon sha ka ïingdorbar thawaiñ ban wan. Ngi kwah ban ïada ïa ka khyndew ka shyiap bad ban wanrah ïa ka roi ka par ha ka jylla. Namar ba kiwei pat ki seng saiñ pyrthei kim shym la lah ban pynmih ïa ki jingmih kiba don jingmut ha kaba pynbeit ïa ka jingeh kaba dang ïai bteng, dei ban ailad ïa kiwei pat ki bor saiñ pyrthei kum ka Shiv Sena kiba ïada ïa ki jingim bad ïa ki jingdon jingem,” la ong u Singh.
Ka ïingdorbar thaw aiñ jong ka Manipur kaba don 60 ngut ki dkhot ka kynthup ïa 40 tylli ki jaka ha them Imphal bad 20 tylli ki distrik ha ki jaka lum.
Haba pynpaw ïa ka jingshaniah ha ka jingkyrmen jong ka seng, u Singh u la ong ba ka Shiv Sena ka thmu ban ïoh ïa ka jingjop kaba ar dak ha ka elekshon sha ka Ïingdorbar Thawaiñ bad ban seng ïa ka jinglong saiñ hima sima kaba khlaiñ ha ka jylla.
“Ngi dang trei ban pynkhlaiñ ïa ka nongrim jong ka eng jong ngi ha kylleng ka Manipur bad ngi don ka jingkyrmen ban ïoh ïa ka jingjop kaba pawnam ha ka elekshon,” u la ong.
Nalor ka elekshon sha ka ïing dorbar thawaiñ ka jylla, ka seng ka dang pynkhreh ruh ban ïakhun ïa ka elekshon Panchayat kaba la slem bha ha kane ka jylla.
U Singh u la ong ba ka Shiv Sena ka thmu ban pynïeng palat 30 ngut ki kyrtong lada pynlong ïa ka Local Body Poll kumba la buh por.
La khmih lynti ba ka elekshon Panchayat ha Manipur kan long ha ka 1 tarik u Risaw, kaba dei ka elekshon kaba nyngkong eh ha ki katto katne snem hadien ba ki bor ba la jied mynshuwa ki la pyndep ïa ka por jong ki ha u snem 2022.
Kane ka jingpynbna ka wan ha ka por ba ka Manipur ka dang ïakhun pyrshah ïa ki jingeh hadien ka jingïakynad hapdeng ki jaitbynriew bad ka jingbym thikna ha ka saiñ hima sima.
Katto katne ki seng saiñpyrthei ki la dep sdang ïa ki kam sengbhalang bad ki prokram pynïaid shabar kum ka jingpynkhreh ïa ka elekshon sha ka Ïingdorbar Thawaiñ, kaba la khmih lynti ba yn peit bniah bha haba kheiñ ïa ka jinglong jingman jong ka saiñ pyrthei kaba nang kiew ha ka jylla.
Da kaba sah sa tang shisnem ka elekshon sha ka Ïingdorbar Thawaiñ, la khmih lynti ba ka jingtreikam ha ka saiñ hima sima kan nang jur ha kylleng ki jaka them bad lum katba ki seng ki wad ban pynïar ïa ka nongkyrshan jong ki bad ban buh ïalade ha khmat jong ka jingïakhun elekshon kaba kongsan.
