Imphal, Jylliew:
Ka Goa Crime Branch ka la kem ïa u Nongthongbam Ingo uba la tip ruh kum u Krishna bad u Lal na Margao ha South Goa ha ka sngi Thohdieng, ka 19 tarik, Jylliew bad ki pulit ki la ithuh ïa u ba u dei uba la kam Lieutenant Colonel jong ka PLA, ka kynhun lehnoh kaba trei kam ha Manipur.
Katkum ka jingïathuh jong ki heh pulit, la ong ba u Ingo u la poi ha Goa ha ka 16 tarik u Jylliew bad la lap ïa u hadien ki jingtip ba la ïoh na ki bor wad bniah. La thwet ïa u ha ka mukotduma ba la rujor hapoh ka Unlawful Activities (Prevention) Act (UAPA) ha Lilong Police Station ha Manipur ha Thoubal distrik.
Ki pulit ki la ïathuh ba katei ka jinglap ka long hadien ba arngut ki lehnoh kiba la shah kynnoh ki la shah kem ha ki pulit ka Manipur ha ka 5 tarik u Jylliew ha kaba ïadei bad ka mukotduma dawa pisa hapoh ka UAPA.
Ha ka jingtohkit, ki bor pynïaid ki la ïoh jingtip shaphang ka jaka sah jong u Ingo, kaba la pynlong ïa u ban shah kem ha Goa.
Ki heh sorkar ki la ïathuh ba u Ingo u la phet rieh la palat 20 snem bad u dei uwei na kiba shah kynnoh ba la wad ha ka mukotduma ba la mudui.
