World Cup: Thep kol nyngkong u Salah, pynliem ka Egypt ïa ka New Zealand

Shillong, Jylliew 22

U khlur ïalehkai ka Liverpool u Mohamed Salah u la thep ïa ka kol kaba nyngkong na ka bynta ban pynlong ïa ka Egypt ban khur jingjop nyngkong ha ka FIFA World Cup 2026, hadien ba ka la lah ban pynliem ïa ka New Zealand da 3-1 kol ha Vancouver.

U Salah bad u Mostafa Zico ki la lah ban thep kol watla ki la pyrshang ban ïarap pynbuh bol ha ka kylla step na ka bynta ka Egypt. Hynrei ha ka kylla step ka New Zealand ka la pynkhih jar nyngkong ha ka jingïa-khun jong ka Group-G kaba long ha ka step jong ka lah sngi U Blei. Ïa ka kol kaba lai jong ka Egypt la thep da u Trezeguet.

U Salah u la lehkmen hadien ba u la thep ïa ka kol kaba 68 jong u ha ki jingïalehkai bar ri ha ryngkat ki nongkyrshan ha BC Place, Vancouver.

Hadien ba la pynshong noh ïa u Salah ha ka minit kaba 85, u la ïoh ka jingshah leh burom ha ki paidbah nongkyrshan da kaba ïeng lang baroh.

Kawei pat ka jingïaleh-kai jong ka Group-G ka la kut ha ka jingïakhaid, kynthup ïa ka jingïakhun ka Belgium bad ka Iran ha kaba kim shym la lah ban thep kol.

Ha ka jingshisha ka New Zealand ka la pynkhih jar nyngkong eh lyngba u Finn Surman, uba la ïoh ban thep da ka khlieh ha ka minit kaba 15 na ka bynta ban pynlong ïa kane ka kynhun ban tam da shi kol ha ka kylla step hashwa ba ka Egypt kan wanphai da ka jingkhlaiñ bor ha ka kylla miet.

Te kumta ka Egypt kan pynkhreh ïa ka jingïaleh-kai kaba khatduh pyrshah ïa ka Iran ha ka sngi Thohdieng. Kane ka kynhun ka la thikna ban jam sha kawei pat ka wat jingïakhun watla ka shah rem ne jop. Hynrei ka New Zealand ka la dangkhmih lynti ban khur ïa ka jingjop kaba nyngkong ha kane ka lympung da kaba kan ïakynduh pyrshah ïa ka Belgium ha katei kajuh ka sngi khnang ban pynthikna ban jam sha kawei pat ka wat jingïakhun.

Kumba ka paw u rangapkol ka Egypt u Mostafa Shoubir u la lah ban pyllait na ka jingshah thep haduh saw sien, katba u Max Crocombe u la ïakhun dohïap na ka bynta ka New Zealand ban pyllait haduh saw sien.

“Ha ki snem ban wan, ngin kynmaw ba kane ka dei kawei na ki jingjop ha ka histori”, la ong u Salah.

U la ïaroh ïa ki paidbah nongkyrshan jong ka Egypt, da kaba ong: “Ka long kumba ngi ïalehkai ha Egypt bad ka dei ka jingjop kaba khraw.”