Agartala, Jylliew:
Kumba la sakhi, la ong ba hapdeng ka jingpynkhlaiñ ïa ka jingpahara, ka eksamin NEET(UG) 2026 ba la pynlong biang ka la ïaid beit ïaid ryntih ha ka sngi U Blei, ha kylleng ki 10 tylli ki jaka thoh eksamin ha Tripura, kynthup ïa ki khyndai tylli ki jaka ha West Tripura distrik bad kawei ha Dhalai distrik.
Ha ka jingïakren bad ka lad phah khubor, u Magistrate District jong ka West Tripura Distrik u Dr. Vishal Kumar u la ong ba ka eksamin ka la ïaid beit khlem kino kino ki jingpynthut ne wanrah ïa kino kino ki jingjia bym sngewtynnad.
“Ha kane ka sngi, ka eksamin NEET UG kaba la pynlong biang ka la ïaid beit. Ngi la leit sha Kendriya Vidyalaya ban jurip ïa ki jingpynbeit. Tang ha West Tripura distrik, ki don khyndai tylli ki jaka thoh eksamin. Ki samla pule ki la rung sha ki jaka eksamin ha ka por 1:30 nohphai sngi, bad ki biometric attendance systems ki la treikam bha. Hapoh ka jingpynïaid jong ki nongmihkhmat jong ka National Testing Agency (NTA) ka eksam ka la ïaid beit. Ki bor ai jingïada ki la pynkhlaiñ ïa ki jingpyntreikam habaroh ki jaka thoh eksam,” ong u District Magistrate.
Katkum ka jingong jong ki heh sorkar, ki don kumba 4,500 ngut ki nongthoh eksam kiba la eit ban thoh ïa ka eksamin ha kylleng ka jylla.
Ban pynthikna ba kane ka eksamin kan long kaba ïaid beit ïaid ryntih bad kaba suk, u District Magistrate u la pynmih ïa ka hukum katkum ka kyndon 163 jong ka Bharatiya Nagarik Suraksha Sanhita (BNSS).
Ka hukum ba la buh ka la pyrkhing bha ha ki jaka thoh eksam, ha kaba ïadei bad ka jingïalum briew bad ka jingpyndonkam ïa ki jingsawa kiba lah ban pynthut ïa ki nongthoh eksam.
