Khliehriat, Jylliew 23
Ka ïew ïadie ïathied rangïalehkai ne Inter Club Transfer ba la pynïaid da ka East Jaiñtia Hills District Football Association (EJHDFA) ka la nangjam shaphrang ha ka shlem treikam jong ka East Jaiñtia Hills District Football Association kaba ha madan Diengshynrum.
Kane ka ïew ka sdang ha ka 22 tarik bad kan kut ha ka 27 tarik mynta u bnai, hashwa ban sdang ka aïom ïalehkai jong u snem 2026 ha baroh ki Division ha la ki jong ki kyrdan ïalehkai.
U General Secretary ka EHJDFA Bah James Sutnga ula pyntip ba haduh mynta la pyllait 200 tylli ki form, bad ki nongïalehkai kiba wan ban soi hi dalade ha ka shlem treikam jong ka Synjuk ki long baroh haduh 35 ngut.
U la pyntip ruh ba ka lympung ïalehkai 3rd Division bad 2nd Division kin sdang naduh u Naitung mynta u snem.
