Aizawl, Jylliew:
U President ka Mizo National Front (MNF) uba dei ruh u Myntri Rangbah barim ka Mizoram u Zoramthanga ha ka 22 tarik u Jylliew, u la pynskhem ba ka seng jong u ka dang pynkhreh bha na ka bynta ban wanphai biang ha ka bor synshar ha kane ka jylla bad kyntu ïa ki nongbud bad ki nongkyrshan jong ka seng ba kin long kiba ïatylli bad kiba ïaineh ha ka jingthmu jong ka seng.
Haba kren ha ka jingïalang jong ka seng ha Aizawl, u Zoramthanga u la ong ba ka MNF ka la sdang ban buh ïa ka nongrim na ka bynta ki jingïaleh elekshon ki ban sa wan bad ka dang shim ïa ki sienjam kiba donkam ban ïoh biang ïa ka jingshaniah jong ki paidbah hashwa ka elekshon sha ka ïingdorbar thawaiñ ka jylla ban wan kaba la buh ban long ha u snem 2028.
“Ka MNF ka dang pynkhreh ïalade ban thaw sorkar biang. Ki sienjam kiba donkam ki dang ïaid ha kata ka liang, bad nga kyntu ïa ki dkhot jong ka seng ba kin ïai long kiba ïatylli, kiba aiti, bad kiba skhem ha ka jingngeit jong ki,” u la ong.
Kane ka jingkren ka la mih hadien palat ar snem ka Zoram People’s Movement (ZPM) kaba don ha ka liang synshar ka la pynliem ïa ka MNF ba mynta ha ka elekshon sha ka ïingdorbar thawaiñ ka jylla Mizoram ha u snem 2023 bad thaw ïa ka sorkar hapoh ka jingïalam u Myntri Rangbah ka jylla u Lalduhoma.
