Shillong, Jylliew 23
Ka Lummawbah SC ka la pynliem noh ïa ka Lawmali Pyllun SC da 4-2 kol na ka bynta ban khur jingjop ha ka lympung ïalehkai SRGT 3rd Division Football League 2026 ba la pynïaid da ka Shillong Sports Association ha ka sngi Ba-ar.
Ha kane ka jingïakhun kaba la long ha SSA Stadium, ka Lummawbah tang mar ïasdang ka jingïalehkai ka la pynkhih jar nyngkong eh lyngba u Adelbor K Shun ha ka minit kaba 3 bad ïa ka kol kaba ar la thep da u Flerando Sohkhlet (13). Hadien lai minit ka Lawmali Pyllun ka la pynphai kylla shi kol lyngba u Melford E. Wanñiang.
Hadien ba la bteng ïa ka jingïalehkai jong ka kylla miet, ka Lummawbah ka la ïoh ban thep biang sa ar kol lyngba u Teilang Ryntathiang ha ka minit kaba 45 & 60. Hynrei shwa ban wai ka Lawmali ka la pynphai kylla shi kol lyngba u Mebanteilang Marbaniang (76) hashwa ba kan mad ïa ka jingshah rem.
Haba phai sha kawei pat ka jingïakhun kaba la long kham hashwa hapdeng ka Kharang SC bad ka Umphyrnai SC ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
Ha ka sngi Balang ka jingïalehkai kan long hapdeng ka Ïaitylli SC pyrshah ïa ka Pomlakrai SC ha ka por 1 baje mynsngi bad ka Rynjah SC ïa ka Mawkasiang SC ha ka por 4 baje nohphai sngi.
