Shillong, Jylliew 23
Ka lympung ïalehkai 11th Meghalaya Jeet Kune Do State Level Championship 2026 kaba ar sngi ba la pynïaid da ka Meghalaya Jeet Kune Do Association (MJKA) ka la poi sha kaba kut ha ka 20 tarik ha Madanrting Indoor Sports Hall, Madanrting, Shillong.
Ha kane ka lympung la wan shim bynta da kumba 100 ngut ki nongshim bynta kiba la lah ban pyni ïa ki sap ïalehkai jong ki ha ryngkat ka mynsiem ïalehkai.
Ha katei ka sngi la ïadon long u Bah D. Ranee, uba long u nongseng jong ka MJKA ha ryngkat ka Kong Bajoplin Kharmudai, Secretary, ki dkhot ka executive committee bad kiwei kiwei.
Ïa kane ka lympung la plie da u Deelip Roy, President ka United Jeet Kune Do Federation of India (UJKDFI) kum u kongsan, ha kaba u la pynpaw ba ka jingthmu jong ka MJKA ka long ban kyntiew ïa ka jingïalehkai Jeet Kune Do ha ka Jylla da kaba pynshlur ïa ki khynnah samla ba kin pynleit jingmut ha kane ka jingïalehkai da kaba pyni ïa ki sap ïalehkai ba kyrpang jong ki.
Ha ka sngi pynkut la ïadon lang u Bah Pilotius Lamare, Officer-in-Charge ka Madanrting Police Station ryngkat ka kynhun jong u. Te kumta u la ai khublei ïa baroh kiba la wan shim bynta, ki nongjop, ki coach bad kumjuh ki nongpynïaid ban pynurlong ïa kane ka lympung kaba jop.
Na ka liang ka MJKA ka la pynbna ba ki nongïalehkai kiba la khur takma ha katei ka lympung ki la shah jied ban mihkhmat ïa ka Jylla sha ka National Jeet Kune Do Championship 2026, kaba la buh ban long ha Cotton University, Guwahati, Assam naduh 26 haduh 28 tarik mynta u bnai.
Katei ka synjuk ka la pynpaw ka jingsngewskhem ba ki nongïalehkai ba shah jied kin ïai bteng ban pynneh pynsah ïa ka jingsarong jong ka Jylla bad ban ïalehkai katba lah ha ka lympung ïalehkai hapoh ka ri.
