Imphal, Jylliew:
Ki pulit jong ka Manipur ki la kem ïa lai ngut ki lehnoh ha ki jingkhynra ba kyrpang ba la pynlong ha kylleng ka jylla, katba ïa ka jaka buh tiar bad ki kuli la lap hadien ka jingkem ïa uwei u dkhot jong ka RPF/PLA kham mynshwa ha Goa.
Ïa uwei u nongdawa pisa uba don jingïadei bad ka SOREPA la tip kyrteng kum u Yumnam Thoiba Meitei (57) u la shah kem ha ka 22 tarik, Jylliew na ka ktem ai jingïarap ha kaba u la ju sah.
Utei u briew u dei u nongshong shnong jong ka Moreh Bazar Ward No. 8 bad u dang sah ha ka jaka ai jingïarap jong ka Pravabati College kaba don ha Mayang Imphal.
Ha kawei pat ka jingkhynra kaba la long ha ka 23 tarik, Jylliew, ki bor pahara ki la ïoh kem ïa u Kshetrimayum Frenston Singh uba la ju tip ruh kum u Nanao bad u Ithat uba la khot ïalade kum u Sergeant Major jong ka PREPAK (Red Army).
Une u briew uba la 40 snem ka rta u dei uba shong ba sah ha Top Khongnang Makhong ha Imphal East district bad u la shah kem na ka jaka jong u kaba hap hapoh jong ka Porompat Police Station.
Shisngi shwa kane, ki bor pahara ki la ïoh ban kem sa uwei pat u lehnoh ka SOREPA uba la tip kyrteng kum u Yumnam Joyraj Singh ba la tip ruh da ka kyrteng kum u Ibomcha (36) na ka thaiñ Mayang Imphal Maibam Mamang Leikai kaba hap hapoh jong ka Mayang Imphal Police Station ha Imphal West distrik.
Ha kajuh ka por, ki bor pahara ki la ïoh ban kurup ïa ki tiar ïaleh bad ki kuli kiba bun bha na Chingdompok ha ka thaiñ Thoubal ha ka 22 tarik u Jylliew bad kane ka jinglap ka long hadien ba la kem kham hashwa ïa u briew uba la shah kynnoh ba u dei u heh ka RPF/PLA na Nongthogbam Ingo uba la tip kum u Krishna bad kum u Yuhenba (51) na Cuncolim kaba don ha South Goa da ki pulit ka Manipur ha ryngkat ka jingïarap jong ki pulit ka Goa ha kaba ïadei bad ka mukotduma ba la mudui ha thanat Lilong.
Ki tiar kiba la ïoh ban kurup ha kane ka jingkhynra ki kynthup ïa ar tylli ki suloi INSAS, khyndai tylli ki Magazine INSAS, ar tylli ki pistol 9 mm bad 163 tylli ki kuli bapher bapher.
Hashwa kane, ki bor pahara ki la ïoh kurup ïa ka jaka buh tiar ïaleh, ki tiar siat bad ki tiar pynbthei ki shipai ha ka jingkhynra lang ïa ki lehnoh ba la pynlong ha kylleng ki jaka lum jong ka distrik Kangpokpi ha Manipur ha kine ki saw sngi ba la dep.
Katkum ka jingong ki pulit ka Manipur, ïa kane ka jingkhynra la sdang ha ka 20 tarik u Jylliew hadien ki jingtip ba kyrpang jong ki bor syntiat ha kaba ïadei bad ka jingdon jong ki lehnoh kieng atiar ha ki jaka ba kyllum jong ka Leilon Vaiphei, Leilon Munlui, Molhoi, P. Moulding, Leilon Khunou bad ki jaka ba marjan.
Kane ka jingkhynra ka kynthup ïa ka jingpyntreikam ïa ki pulit ka Manipur, ki pulit Central Reserve, Rapid Action Force, Commando Battalion for Resolute Action, bad ki shipai Indian Army.
Ki pulit ki la ïathuh ba ki bor pahara ki la shah siat ha ki briew kiba la suba ba ki dei ki lehnoh ha ka por ba pynlong ïa ka jingkhynra, kaba la pynlong ïa ka jingïasiat kaba markylliang.
Wat hapdeng ka jingpyrshah, ki shipai ki la bteng ïa ka jingwad bad jingkhynra kaba jur ha ka 21 bad 22 tarik u Jylliew ha kylleng ki jaka ha ka thaiñ.
Ha kane ka jingkhynra, ki bor pahara ki la lap ïa ka jaka buh tiar ïaleh kaba bun bha. Katei ka jingïoh kurup ka kynthup ïa 17 tylli ki suloi shi ktang bad ar ktang, ha ryngkat ki phra tylli ki tiar siat kiba khlaiñ bor, kynthup ïa ar tylli ki suloi AK-47, kawei ka M4 Carbine, ar tylli ki Self-Loading Rifles (SLRs), kawei ka suloi SKS bad kawei ka Improvised Sniper .303 rifle.
La ïoh kurup ruh ïa 11 tylli ki suloi Single Barrel Loading (SBL).
