Gangtok, Jylliew:
Kin don palat 21,900 ngut ki nongthep vote ha Sikkim kiba lah ban shah weng noh na ka thup kyrteng jong ki nongthep vote jong ka jylla lada ym lah ban pynshisha ïa ki jingtip ba bniah jong ki shwa ban pyndep ïa ka jingpyntreikam ïa ka Special Intensive Revision (SIR) kaba dang ïaid shakhmat ïa ki thup nongthep vote, ong u Chief Electoral Ophisar (CEO) u Raj Yadav ha ka lah sngi U Blei.
Haba kren ha ka jingïalang bad ki nongthoh khubor, u Yadav u la ong ba ka jingpynkylla ïa ka aiñ ka la rung sha ka kyrdan kaba khatduh, ha kaba ki ophisar kiba dei khmih ha ka kam elekshon ki la pynsted ïa ka jingpyntreikam ban pynshisha ïa ki hajar tylli ki Enumeration Form (EF) kiba dang sahteng hashwa ka por ba la buh ha ka 28 tarik u Jylliew.
Katkum ka jingbuh jingkheiñ ba la pynmih da ka Election Department, la ong ba 99.68 per cent ki Enumeration Form la dep ban sam lypa ha baroh kawei ka jylla.
Hynrei tang 84.14 percent na ki phom haduh mynta la lah ban leh Digital bad pynshisha da ki Booth Level Officers (BLO), kaba sah sa 21,928 ngut ki nongthep vote kiba dang hap ban buh jingkheiñ.
Ki heh sorkar ki la ong ba kiba bun na ki mukotduma kiba dang sahteng ki dei kiba ïadei bad ki nongthep vote kiba la khlad noh, kiba la pynkynriah jaka junom, kiba dang sah khlem pat lap ïa ki, kiba ju jah na ki jaka sah jong ki, lane kiba la suba ba ki don ha ka thup thep vote shawei pat.
Ka tnad ka la maham ba ka jingdon jong ki kyrteng kiba la tyrwa ban pyndam ka lah ban nang kiew shuh shuh katba ka jingpynshisha ka dang ïaid shakhmat.
