Shillong, Jylliew 25
Ka Sorkar Jylla ha ka sngi Palei ka la pynbna ba kan buh ïa ka ‘Chief Minister’s Football Fan-Park’ na ka bynta ka lympung ïalehkai FIFA World Cup 2026, kaba dangïaid mynta ha America, Canada bad Mexico.
Ïa kane yn buh ha ka Parking Lot jong ka Shillong Recreation Ground Trust (SRGT) kaba ha Polo. Kane ka jaka ka long kaba biang eh na ka bynta ki paidbah nongpeitkai ba kin sakhi da la ki jong ki khmat ïa katei ka lympung da ka screen kaba heh bad kane ka long ka jingangnud jong ka Jylla ban ïaleh ha ka ban kyntiew ïa ka phutbol.
Kat kum ka kyrwoh la ong ba ïa kane ka fan park yn plie mynta ka sngi Thohdieng. Ki paidbah nongkyrshan ki lah ban ïa lum lang ban sakhi ïa ki jingïalehkai ha ka screen kaba heh bad kaba itynnad. Kane ka jingpyni ïa ki jingïalehkai kan long ha ki kynta jong ki jingïalehkai ha ka por 9:30 mynmiet, 10:30 baje, bad 12:30 shiteng miet.
Ban pyndap ïa ka jingpynbyrngia, kin don ki prokram ki ban sa pyni kum ka Chief Minister’s Meghalaya Grassroots Music Program (CM-MGMP), kaba pynïasoh lang ïa ki jingïalehkai bad ki jingpynbyrngia ha kane ka lympung kaba shi bnai kynthih.
Kat kum ka kyrwoh ba la pyllait da u Director ka tnat ïalehkai, la ong ba ym donkam ban siew eiei na ka bynta ki paidbah ki ban wan sakhi ha ka Chief Minister’s Football Fan-Park. Te kumta la kyntu ïa ki nongshong shnong bad ki nongwan jngohkai ban ïadon bynta lang ha ka jingrakhe bad ban long shi bynta jong kane ka jingïalehkmen lang ha kane ka nongbah.
Kane ka pyni ïa ka jingshim khia jong ka Sorkar Jylla ban thaw ïa ki jaka ba thymmai jong ka imlang sahlang na ka bynta kane ka lympung ïalehkai ka pyrthei. Kane ka jingshim khia jong ka Sorkar ka long ba kan tei ïa ka stadium kaba heh duh ha ri India, ïa kaba mynta ka jingtei ka dangïaid ha Mawkhanu.
Da kaba wanrah ka jingkylla ïa ki jaka paidbah sha ka jaka pdeng jong ka jingïalehkai jong ka pyrthei, ka Jylla ka dangïai bteng ban kyntiew ïa kane ka jingïalehkai.
