Shillong, Jylliew 25
Ka rephri ba paw ka Jylla, ka Riïohlang Dhar ka la shah pynkhamti kum kawei na ki nongpynïaid ne rephri na ka bynta ka lympung ïalehkai FIFA U-20 Women’s World Cup 2026 ka ban long ha Poland ha u Nailur mynta u snem.
Ïa kane la pynbna da ka All India Football Federation ha ka sngi Palei, ha kaba ka la pynpaw ha ka rynsan social media da kaba ong ba hadien ba ka la ïoh ban pynïaid ha ka U-17 Women’s World Cup ha u 2024 kaba la long ha Dominican Republic, kane kan dei ka sien kaba ar ba la thung biang ïa ka Riïohlang (FIFA qualified assistant referee).
“Kane ka long ka jingai mynsiem ïa ka pateng ka ban wan jong ki nongpynïaid ïa ki jingïalehkai jong ka ri India,” la pynpaw kat kum ka kyrwoh na ka AIFF.
Lah ban kdew ba ka Riïohlang, kaba don ha ka kam pulit bad kaba la ïohpdiang ïa ka khusnam U Kiang Nangbah mynta u snem, ka la ïoh ban pynïaid ha ki katto katne ki lympung ïalehkai ha ki snem ba la lah. Ha u snem 2024 ka la shah thung ban long kum kawei na ki nongpynïaid ha ka lympung ïalehkai AFC U-17 Women’s Asian Cup kaba la long ha Indonesia bad mynta ka la ïoh ban pynïaid ha kajuh ka lympung kaba la long ha China.
