Shillong, Jylliew 28
U Hasebinson Marweiñ bad ka Marqueenless Ramsiej ki la khur jingjop ha ka jingïakop mareh ba la tip kum ka 7th Shillong 10K Run 2026 ba la pynlong da ka Meghalaya State Olympic Association (MSOA) ha ka sngi Saitjaiñ ha kane ka nongbah.
Ka jingpynlong ïa kane ka jingïakop ka long shi byntas ban rakhe ïa ka International Olympic Day kaba long ka jingseng ïa ka International Olympic Committee ha u snem 1894. Te kumta la pynlong ïa kane ka jingïakop mareh kaba 10k na kylleng ka pyrthei bad ha kane ka nongbah la sakhi ïa ka jingshim bynta da ki spah ngut ki nongmareh naduh ki khynnah samla haduh kiba la kham rangbah. Ïa kane ka jingïakop la kyrshan lang da ka tnat ïalehkai jong ka Sorkar Jylla, ki bor pynïaid district, ka tnat pulit bad ki nongïarap mon sngewbha ban pynbit pynbiang ïa kane ka prokram.
Ha kane ka jingïakop, u Hasebinson u la tam tang khyndait ban wan ha ka kyrdan ba nyngkong, ïa ka kyrdan ba-ar la ïoh da u nongjop jong u snem 2024 u Wanbok L Mawphlang. Katba ïa ka kyrdan balai la khur da u Junom Phawa.
Haba phai ha ka liang ki jingïakop jong ki kynthei, la jop da ka Marqueenless, kaba la wanphai biang sha kane ka jingjop naduh ba ka la khur ha ka jingjop jong u snem 2024. Kane ka nongmareh kaba la wan ha ka kyrdan balai ha u 2022 bad 2023. Ïa ka kyrdan ba-ar la ïoh da ka Jidalin Tympuiñ, katba ka Maryqueen Pale ka la wan balai.
Kitei ki ar ngut ki nongjop kiba la ïohpdiang ïa ki khusnam pisa kiba mar T. 5,000, kiba la wan ba-ar bad balai ki la ïoh T. 3,000 bad T. 2,000. La sam khusnam ruh ïa kiba wan basaw haduh ba phra, nalor ka jingsam khusnam ïa kiba 55 snem shaneng.
Ïa kane ka jingïakop la kaweh lama da u khlur nongmareh barim ka Jylla u Bah Binningstar Lyngkhoi lem bad u khlur ïalehkai karate u Bah Damang Syngkon, uba la bat mynta kum u District Sports Officer ka East Khasi Hills. la ïadon lang ruh ki nongïalam ka MSOA kiba kynthup ïa u Working President Bah John F Kharshiing bad u General Secretary Bah Finely L Pariat.
Kine ki ar ngut ki nongïalam ki la kyntu ïa ki nongmareh ba kin pynrung kyrteng ïalade ban ïashim bynta ha ka Sohra International Half Marathon 2026 (10km & 5km) ka ban long ha 4 tarik u Nailur. Ka jingpynrung kyrteng kan plie naduh ka 1 tarik u Naitung bad yn ailad tang 11,000 ngut ki nongmareh.
