Agartala, Jylliew:
Ka kynhun jong ki doktor ba tbit bha ka la pyrshah ïa ka rai jong ka sorkar Tripura ban khang ïa ka jingsumar shimet da ki nonghikai bad ki ophisar ka koit ka khiah ha ka Agartala Government Medical College (AGMC) bad ka GB Pant Hospital ba la pynïaid da ka sorkar, da kaba kynthoh ba ïa kane ka sienjam la wanrah khlem ka jingïamir jingmut kaba biang bad kan ym lah ban pynbha ïa ka rukom sumar pang lada ym don ka jingsumar kaba lyngkot.
Ha ka shithi sha ka AGMC bad u GB Pant Hospital Medical Superintendent Dr. Bidhan Goswami, ka Superspeciality Doctors’ Forum ka la ong ba ka rai jong ka sorkar na ka bynta pyntreikam bad pynïaid shakhmat khlem ki jingtip kiba biang ha kaba ki bym pat tbit ki lah ban ai ki jingsumar ïa ki nongpang.”
Ka forum kaba kynthup ïa 14 ngut ki doktor kiba tbit bha, ka la ong ba bun ki dkhot ki la rung sha ka kam sorkar ha ka por ba ym don jingkhanglad ïa ki kam shimet bad ki la pdiang ïa ki kyrdan jong ki da kata ka jingsngewthuh.
Ka la kynthoh ba ka jingpynkylla ïa ki kyndon jingshakri shiliang ka pynduhjait ïa ka jingkular jong ki doktor bad ka lah ban ktah jur ïa ka jingpynroi kaba dang ïaid shakhmat jong ki jingshakri ba kyrpang ha ka koit ka khiah ha ka jaka sumar.
Ki doktor ki la pynskhem ba tang ka jingkhang ïa ki kam shimet kan ym lah ban pynbha ïa ka rukom sumar pang lymda la pynbeit ïa ki jingeh kiba la slem bha, kynthup ïa ka jingduna bor briew, ki jingtei kiba biang, ki jingduna ha ki jaka sumar ba kyrpang (ICU) bad ki jaka sumar (OT), ka jingduna ki nongtrei ba kyrshan, bad ka jingbym don ki jingpynkiew kyrdan bad ki jingpynshlur.
Ka forum ka la kynthoh ruh ïa ki jingai jingmut ba ki doktor ki bym kwah ban pdiang ïa ka polisi thymmai ki dei ban iehnohkam, da kaba batai ïa kum kine ki jingkren kum “ki jingpynjah burom bad jingbym burom ïa ka kam.”
Ha ka jaka ban pynjari da ka jingkhang kaba pura, ka la tyrwa ïa ka rukom “jied ban rung, ym ban mih noh” ka ban ailad ïa ki doktor ban jied mon sngewbha la kin sangeh ne em ïa ka jingtrei shimet.
Kane ka jingïakynad ka long hadien ka jingïada jong u Myntri Rangbah ka jylla u Manik Saha ïa ka rai jong ka sorkar ban khang ïa ka jingsumar shimet da ki nonghikai bad ki ophisar ka koit ka khiah jong ka hospital sorkar ba hakhmat eh jong ka jylla.
Kane ka jingleh ka la ïoh ruh ïa ka jingshah kynthoh na ki liang pyrshah. U nongïalam ka liang pyrshah u Jitendra Chaudhury u la ong ba ka sorkar ka dei ban shim ïa ka “lynti kaba bha tam” ban pynbha ïa ki jingshakri ha ka koit ka khiah khlem da beh noh ïa ki riew shemphang kiba la tbit bha.
U la maham ba ki kam sumar pang ki lah ban shah ktah lada ki doktor ba rangbah ki iehnohkam bad u la kdew ba ban khring ïa ki riew shemphang nabar ka jylla kan long kaba eh.
U Sudip Roy Barman, myntri ka koit ka khiah barim bad u MLA ba rangbah jong ka seng Congress, ula kynthoh ruh ïa katei ka rai, da kaba ong ba ka dei ka rai “ka bym lah ban long satia” bad kyntu ruh ia ka sorkar, ba kan bishar bniah biang.
U la kynthoh ba ka jylla kam lah ban pynbor ïa ki nongtrei ka koit ka khiah ban dang trei palat ïa ka por trei ba man ka por jong ki kaba 8 kynta bad u la maham ba kane ka polisi ha kaba kut ka lah ban pynjynjar ïa ki nongpang ha kylleng ka Tripura.
