Shillong, Jylliew 28
U Lionel Messi u la ïoh sa kawei pat ka rekod ha ka FIFA World Cup ha ka jingïalehkai jong u hadien ba u la long u rangïalehkai uba la lah ban thep kol bun eh na shabar jong ka penalty, ha kaba ka Argentina ka la jop da 3-1 kol ïa ka Jordan ha ka jingïalehkai kaba khatduh jong ka Group-J ha Arlington.
Utei u kapten ka Argentina u la thep lyngba ka free-kick ha ka minit kaba 80 ha ka AT&T Stadium ha ka step jong ka sngi U Blei. Kane ka dei ka kol kaba hynriew ha ka World Cup na shabar ka ‘box’, kaba la pynlong ïa u ban tam ïa u khlur ïalehkai ka Brazil u Rivelino, uba la bat ïa ka rekod da kaba thep san kol.
Kane ka kol ka la kyntiew ruh ïa ka jingthep kol jong u Messi sha ka 19 kol ha ka World Cup, kaba la pynjlan ïa ka rekod jong u kum u nongthep kol ba bun tam jong ka Argentina ha kane ka lympung. Haduh mynta u la thep 6 tylli ki kol ha ka World Cup kaba dangïaid shakhmat bad ka Argentina ka la lah ban pyndep da kaba khur jingjop baroh lai sien ha kane ka lympung.
Kumba ka paw ka jingïaid u Messi ha ka World Cup ka la sdang da ka hat-trick pyrshah ï aka Algeria, hadien la bud sa ar kol ba la thep pyrshah ïa ka Austria. Ha ka jingïakhun pyrshah ïa ka Jordan, u coach ka Argentina u Lionel Scaloni ha kaba sdang u la pynshong shwa ïa utei u khlur ïalehkai ba la 39 snem, hynrei u la pynmih ïa u ha ka minit kaba 60 bad u la lah ban thep kol haduh 20 minit lyngba ka free-kick.
Lyngba kane ka jinglah ban thep kol, u Messi u la long u rangïalehkai ba nyngkong eh ban ïoh thep kol ha ka FIFA World Cup.
U la long ruh tang u, u nongïalehkai ba saw ban thep kol ha baroh lai tylli ki jingïalehkai (group) ha ka World Cup naduh ba la pyntreikam ïa ka rukom ïalehkai group ha u snem 1998.
Kumba ka long mynta ka Argentina ka la ïoh ruh ban khur ïa ka rekod da kaba khur jingjop kaba 50 sien jong ka ha ka FIFA World Cup, ha kaba ka la long ka ri kaba lai ban poi sha kane ka kyrdan hadien ka Brazil bad ka Germany.
Watla ka la wanrah ka jingkylla da kaba pynkylla haduh khyndai ngut ha kaba sdang ka jingïalehkai, hynrei ka Argentina ka la lah ban ïalehkai bha haduh kaba kut ka jingïalehkai.
U Giovani Lo Celso, uba dang-ïalehkai nyngkong ha ka World Cup hadien ba u la duh ïalehkai ha u 2022 namar ka jingmynsaw, u la ïoh ban pynkhih jar nyngkong ha ka minit kaba 19 lyngba ka free-kick.
Kumjuh u Lautaro Martinez u la pynbud ïa ka kol kaba ar lyngba ka penalty hadien ba la bishar bniah lyngba ka VAR hadien ka jingshah pynur u Marcos Senesi. Te kumta utei u rangïalehkai ka Inter Milan u la thep ïa ka kol ba nyngkong jong u ha ka World Cup.
Ka Jordan ka la lah ban pynphai kylla shi kol ha ka minit kaba 55 hadien ba u Musa Al-Tamaari u la ïoh ban thep da kaba shut najan hadien ka jingïarap pynbuh da u Ihsan Haddad. Hashwa ban wai u Messi u la lah ban pynurlong ïa ka Argentina sa shisien pat na ka bynta bynta ban khur jingjop da 3-1 kol.
Te kumta ka Argentina kan ïakynduh pyrshah ïa ka Cape Verde ha ka wat kaba ar (Round of 32) ka ban long ha ka 4 tarik u Naitung ha Miami. Katba ka Jordan ka la hap ban leit phai noh sha la ïing hadien ba ka la shah rem baroh lai sien ïakhun ha ka jingïalehkai group.
