Shillong, Jylliew 29
Ka jingïakynad hapoh ka synjuk ïalehkai jongka Megha-laya Cricket Association ka la nangjur, ha kaba ka kynhun ki dkhot jong ka Apex Council ha ka lah sngi U Blei ka la pynmih ïa ka jingpynbna da kaba kynnoh ïa u President u James P.K Sangma, ba u la ïaid lait ïa ka riti pynïaid bad u la shim ïa ki rai da kaba leh shilliang, kynthup ïa ka rai ban sospon ïa u Secretary bad ban pynbna ïa ka jingïalang ba kyrpang (Special General Meeting) khlem da ïamynjur lang hapoh ka council.
“Hapoh 48 kynta ba u President u la shim hi ha ka bor lade khlem ka jingtip ne ka jingïamir jingmut lang hapoh ka council, la shu rai hi ban sospon ïa u Secretary uba la shah jied, ka jingpynkut shirta jingim ïa u Coach bad Manager; ka jingpynbna ban pynlong ïa ka jingïalang ba kyrpang kaba la shu thoh hi sha u President ka BCCI ha ryngkat ki rai kiba khlem ïamynjur lang,” la ong ka kyrwoh.
Ki dkhot ka council ki la kyntait ïa ka jingkam u President ba ïa ka SGM kaba la thmu ban pynlong ha ka 3 tarik u Naitung 2026, ka long ka bym donkam.
“Ka kyndon 26 jong ka riti pynïaid jong ka MCA kam ai ha u President ïa kano-kano ka bor ban pynduh, pyndam ne pynbna ïa ka jingïalang ba kyrpang,” la bynrap ka kyrwoh.
