Shillong, Jylliew 29
U President barim ka Me-ghalaya Cricket Associa-tion (MCA) u Naba Bhat-tacharjee ha ka lah sngi U Blei u la kyntait ïa ka jingkynthoh u James Sang -ma ha kaba ïadei bad ka jingtohkit ka Meghalaya State Women Commission halor ka jingshah kren kynshleiñ ka kynhun ki ‘thei ïalehkai kriket U-23 ha kaba u la ong ba ka jingujor kam shym la poi ha ka por ba u dangbat ïa katei ka kam.
Halor ka jingkynnoh u Sangma ba ka don ka jingbym shim khia,” u Naba u la ong ba u la leit hajir ïalade hakhmat ka MSWC ha ka 26 tarik u Jymmang 2026, bad u la mynjur ïa ka jingïatreilang bad kane ka jingtohkit.
“Ha jubab ïa ka jingkren u Sangma, kaba la mih ha ki khubor kaba ïadei bad ka jingshah kynnoh jong nga ha ka MSWC ha kaba ïadei bad ka jingshah kren tohmet ki ‘thei ïalehkai U-23 jong ka Jylla, nga kwah ban pynrem jur ïa ka jingkren jong u kaba don ka jingsngew shiliang khmat,” u la bynrap.
U Bhattacharjee u la ong ba la ïathuh hakhmat ka jingtohkit ka MSWC ba ïa ka jingujor jong ki ‘thei ïalehkai kriket U-23 la kynnoh ba la mudui ha ka 3 tarik u Nohprah jong u snem 2025. Hynrei u la ban jur ba ym shym la don uwei ruh na ki heh ka MCA uba la pyntip ïa u ïa kane hashwa ban jied ïa ki dkhot nongkitkam kiba thymmai kaba la long ha ka 19 tarik u Nohprah 2025, lane hashwa ba ka kynhun kan pynkut noh ha ka 13 tarik u Kyllalyngkot 2026.
“Ïa ka jingujor jong ki ‘thei ïalehkai kriket U-23 ym shym la wanrah ha nga da uno uno u dkhot ka MCA hapdeng ka 3 tarik u Nohprah jong u snem 2025 bad ka jingjied ïa ki nongkitkam ba thymmai kaba la pynlong ha ka 19 tarik u Nohprah 2025. Balei ba ïa kane ka mat ym shym la wanrah hakhmat jong ngi,” u la ong.
“Lada ïa kane ka mat la wanrah ban ai jingtip wat ha ka kynta ba khatduh ba ngan pynkut noh ïa ka samoi treikam jong nga, yn jin da la khot ïa ka jingïa-lang Emergency Apex Council ban ïakren ïa kane ka mat kaba kongsan jong ka jingshah thombor bad ban sdang ïa ki kam kiba donkam katkum ka aiñ bad ka rukom treikam,” u la bynrap.
Haba jubab ïa ki jing -kylli halor ka jingïakren kaba thikna, u Bhatta -charjee u la kdew, “Kumba ju long kum u President, nga kham duna ban plie ïa ka email jong ka MCA namar la pyndonkam da ki nongtrei hapoh ophis bad kiwei ki dkhot kiba ju leit bha sha ophis man ka por.”
U la ong ba u don ka jingngeit skhem bad ka jingtohkit kaba kham ïashah liang jong ka MSWC” bad u la kyrpad ïa ka Commission “ban tohkit biang sa shisien ïa ka jingkren bad ki kot ki sla kiba kyrshan halor kane ka bynta.”
U Naba ruh u la pyn-kut noh ïa ka samoi treikam hadien ba u la ïehnoh ïa ka kam. U la ong ba um shym la bat kano kano ka kam hapoh ka MCA naduh ka 19 tarik u Nohprah, 2025, hadien ba la pynbna ïa ki nong-jop, lane hadien ba la aiti pura ha ka 13 tarik u Kyllalyngkot, 2026. Hynrei ki ‘thei ïalehkai kriket ki la leit ujor sha ka MSWC ha ka 3 tarik u Jymmang 2026.
“Kaei ka jingleh kaba la sdang hapdeng kata ka por haduh ka 3 tarik u Jymmang ha kaba ki ‘thei ïalehkai kriket kiba shah kren kynsheiñ, ki la leit sha ka MSWC?” la buh jingkylli u Naba.
“Nga kyntait mardor ïa kano kano ka jingkynnoh ba ngam shym la leh eiei halor ka jingujor ka bym shym la wan sha nga. Kano kano ka jingkren kaba pynpaw da kumwei pat ka long ka bym shisha, kaba ïalam bakla bad kaba don ka jingsngew pyrshah”, la ong u Bhattacharjee.
