Guwahati, Jylliew:
Ka jinglong jingman jong ka jingshlei um ha Assam ka la nang jur ha ka lah sngi U Blei, ha kaba uwei u briew u la jah rngai bad palat 45,500 ngut ki nongshong shnong ki la shah ktah ha kylleng ki san tylli ki distrik, kaba la pynlong ïa u Myntri ka tnat ki kam pohïing ka sorkar pdeng u Amit Shah ban pynthikna ïa ka jylla ïa baroh ki jingïarap kiba lah ban ai na ka sorkar pdeng.
Katkum ka khubor shlei um kaba la pynmih manla ka sngi da ka Assam State Disaster Management Authority (ASDMA), la ong ba uwei u briew u la shah rong noh ha ka umsaw kaba jur ha ka Jonai subdivision jong ka Dhemaji distrik.
Ka jingwad bniah ka dang ïaid shakhmat ban lap ïa utei u briew uba la jah.
Ka khubor bathymmai ka la ïathuh ba ki don 45,515 ngut ki briew kiba la shah ktah ha ka jingshlei um ha Chirang, Dhemaji, Dibrugarh, Lakhimpur bad Nalbari. Ka jingkheiñ ka pyni ïa ka jingkiew kaba jur bha naduh ka sngi U Blei, ha kaba palat 22,000 ngut ki briew ha kylleng ki hynriew tylli ki distrik ki la shah ktah ha ka jingshlei um.
Ka Dhemaji ka dang dei ka distrik kaba la shah ktah jur tam, ha kaba palat 41,000 ngut ki briew ki la shah ktah, bud sa ka Dibrugarh, ha kaba la jan 4,000 ngut ki briew ki la shah ktah. Ki don kumba 800 ngut eiei kiba la shah ktah ruh ha Chirang distrk.
Hapdeng kane ka jingsniew ka jinglong jingman, u Shah u la ïakren bad u Myntri Rangbah ka jylla Assam u Himanta Biswa Sarma lyngba ka phone ban bishar bniah ïa ka jinglong jingman jong ka jingshlei um bad pynthikna ruh ïa ka sorkar jylla ba kan ïoh ïa ka jingkyrshan ha baroh ki liang na ka sorkar pdeng.
Katkum ka jingong jong ki heh sorkar, u Shah u la kylli bniah ïa ka jingbun jong ka jingjulor na ki wah kiba kiew bad u la bishar bniah ïa ki kam ai jingïarap bad pyllait im kiba dang ïaid shakhmat.
Haba pynpaw ïa ka jingsngewnguh, u Sarma u la ong ha ka jingthoh ha ka rynsan X ba u la pyntip sha u Myntri ka tnat ki kam pohïing ka sorkar pdeng halor ki lad jingïarap bad pynbha kiba la leh ha ka Dhemaji distrik.
“U la pynthikna ruh ïa ngi baroh ïa ka jingkyrshan bad jingïarap kaba lah na ka sorkar India ban ïaleh pyrshah ïa kane ka jinglong jingman,” la ong u Myntri Rangbah ka jylla.
U Sarma u la ong ba la bthah ïa ka Myntri tnad sam umbam umdih ka Susanta Borgohain bad ïa u Myntri ka tnat Revenue bad Disaster Management u Keshab Mahanta ba kin dang ïaisah ban khmih bniah ha kaba ïadei bad ka Dhemaji ban peit ïa ki kam ai jingïarap bad pynbha ïa ki jaka sah.
“Ka jingthmu ba kongsan jong ngi ka long ban pynthikna ba ki jingïarap bad jingpyllait im kin poi sha baroh kiba shah ktah. Ngi dang buddien bha ïa ka jinglong jingman,” ong u Myntri Rangbah bad bynrap ba ka sorkar ka dang pynkhlaiñ ruh ïa ki lad jingïada ïa ka jingtwa khyndew kum ka jingïada na ka jingshah pynjulor shuh shuh na ka jingjur jong u slap.
