Shillong, Naitung 01
Ka Shillong Lajong FC, Nongkseh SSCC bad ka Langsning FC ki la shah kynthup ha ka group na ka bynta ka Shillong zone ha ka lympung ïalehkai Durand Cup 2026, ryngkat bad ka Mumbay FC ha kaba kin ïakhun ha JN Stadium kaba ha Polo.
Ka SLFC ka dei ka kynhun kaba la rung shaduh ka semi final ha u snem ba la lah, hadien ba kan shah pynliem noh ha ka NorthEast United FC, kaba la bat ïa ka nam lahduh. Katba kiwei pat ki ar tylli ki kynhun kiba la shah khot ki long ki lahduh jong ka Meghalaya State League 2026 bad ka Langsning, kaba la wan ba-ar. Ka Mumbay ka dei ka klob kaba dangthymmai bad kaba ïashim bynta ha I-League 3 mynta u snem.
Kat kum ka kyrwoh la ong ba ka jingïalehkai group kan sdang naduh ka 31 tarik mynta u bnai, ha kaba yn pynlong ruh ha kane ka nongbah ïa ka jingïalehkai quarter final bad ka semifinal. Ka kynhun ka ban wan ha ka kyrdan ba ha khlieh kan ïoh rung sha ka quarter final.
Watka ka NEUFC ka la ïoh ban ïalehkai ha kane ka nongbah ha u snem ba la lah, hynrei mynta u snem kan ïalehkai ha Indira Gandhi Athletic Stadium kaba ha Guwahati. Ki jingïalehkai ha Guwahati kin sdang naduh 1 tarik u Nailar. Kiwei pat ki kynhun ki ban don ha kane ka group ki long FC 1 kaba na Jammu & Kashmir bad Ladakh, ka Bodoland FC bad ka Morning Star FC kaba na Karbi Anglong.
Kiwei pat ki nongbah ki ban ïoh pynlong ïa ki jingïalehkai kin long ha Kolkata, Ranchi bad Imphal.
Ïa ki jingïalehkai ha Kolkata yn pynlong ha Vivekananda Yuba Bharati Krirangan bad ha Kishore Bharati Krirangan, kynthup ïa ka jingïalehkai ba nyngkong ha ka 25 tarik mynta u bnai bad ka final ka ban long ha 23 tarik u Nailar. Ki kynhun ki kynthup ïa ka Mohun Bagan, East Bengal, Mohammedan SC, South United FC, CISF, Indian Army, Baghpat FC bad ka Sama-leswari Sporting.
Ka Ranchi kan pynlong ha ka sie kaba nyngkong eh ïa kane ka lympung ha Birsa Munda Stadium ha kaba yn kynthup ïa ki kynhun kum ka Jamshedpur FC, Sporting Club Delhi, Indian Air Force bad ka Defenders FC kaba dei ka kynhun shipai na Sri Lanka.
Ha Imphal yn pynlong ïa ki jingïalehkai ha Khuman Lampak Stadium ha kaba yn kynthup ïa ki kynhun kum ka TRAU, NEROCA, FC Raengdai bad ka Indian Navy.
La pynbna ruh ba ïa ki saw tylli ki jingïalehkai quarter final yn pynlong ha Kolkata, Ranchi bad ha Shillong, katba ka Shillong bad ka Kolkata kin ïoh ban pynlong ruh mar kawei ka jingïalehkai semi final bad ka final kan long ha Kolkata ha ka 23 tarik u Nailar.
