‘Hadien ka Behdienkhlam, yn leit jngoh ïa ki jylla NE, ha u Lber 2027 lah ban pynlong ïa ka NG’

Shillong, Naitung 01

U Myntri ka tnad ïalehkai, u Bah Wailadmiki Shylla ha ka lah sngi U Blei u la ong ba ka Sorkar Jylla kan sdang ban leit jngoh ïa kiwei pat ki jylla ka thaiñ shatei lammihngi kiba ïadon bynta ban pynlong ïa ka 39th National Games hadien ka tamasa Behdienkhlam, ha kaba u Lber jong u snem 2027 la buh kum ka tarik ban pynlong ïa kane ka lympung ïalehkai.

“Ka jingbuddien ka dangïaid shakhmat, haba u Myntri ka sorkar pdeng u la wan jngoh ha ka jingwan ka jong u, ngi la ïakren bniah ïa baroh ki jingdonkam”, la ong u Bah Shylla ha ka jingïalang bad ki nongthoh khubor.

“Naduh ki jingtei haduh ki jingpyntreikam da ki kor ki bor bad ki jaka pynlong jingïalang, ngi la ïalehkai ban pynbiang ïa baroh ki jingdonkam. U Myntri ka sorkar pdeng u la ong ruh ba u sngewkmen bad sngewskhem bha ïa ka jingpynkhreh jong ka jylla Meghalaya.”

U la ong ba ka bynta kaba bud ka kynthup ïa ka jingïatreilang ha ki thaiñ shatei lammihngi.

“Mynta ka la dei ka por ban leit jngoh ïa kiwei pat ki jylla ka thaiñ shatei lammihngi ki ban pynlong lang bad ka Meghalaya. Namar ba ka tamasa Behdienkhlam ka la jan, ngi la thmu ban leit jngoh ïa kita ki jaka hadien ba la kut ka tamasa,” u la bynrap.

Halor ka por ba la buh, u Bah Shylla u la pynshai ba ka tarik kaba khatduh ka dangsahteng.

“Ym pat shym la alh ban pynthikna, hynrei ki la buh antad kumba ngi la pynthikna khatduh ba kan long ha u Lber jong u snem 2027,” u la bynrap.