Shillong, Naitung 01
Ka Mawkasiang SC ka la pynliem noh ïa ka Pomlakrai SC da 2-0 kol na ka bynta ban khur jingjop ha ka lympung ïalehkai SRGT 3rd Division Football League 2026 ba la pynïaid da ka Shillong Sports Association ha ka sngi Balang.
Ha kane ka jingïakhun kaba la long ha SSA Stadium kaba ha Polo, ka la long kaba ïakhaid bha ha kaba ym shym la don ba lah ban thep kol ha ka kylla step. Hynrei dei ha ka kylla miet ba ka Mawkasiang ka la ïoh ban pynkhih jar lyngba u Auspicious ha ka minit kaba 43. Hashwa ban wai kane ka kynhun ka la thep biang sa shi kol lyngba u Western Roy Nongrum (80+5) na ka bynta ban khur syndon ïa ka jingjop.
Haba phai sha kawei pat ka jingïalehkai kaba ar, ka Ïaitylli SC ka la jop da 2-0 kol ïa ka Rynjah SC. Ïa kine la thep da u Franky Nongspung ha ka minit kaba 43 bad kawei pat da u Shwameiaki Kharumnuid (71).
Kane ka lympung kan bteng biang ha ka sngi Palei ha kaba ka Lapalang SC kan ïakynduh pyrshah ïa ka Umpling SC ha ka por 1 baje mynsngi, katba ha ka por 4 baje nohphai sngi ka Sanmer SC kan ïakynduh pyrshah ïa ka Lumparing SC.
