Shillong, Naitung 01
Ka Shillong Lajong Football Club ka la pynbna ba ka la pynthymmai ïa ka kontrak na ka bynta ki phra ngut ki rangïalehkai kiba napoh ka Jylla bad kiba na ka thaiñ shatei lammihngi khnang ban nangïai pynkhlaiñ ïa kane ka kynhun ïalehkai jong ka India Football League.
Kine ki rangïalehkai kiba la pynthymmai ïa ka kontrak na ka bynta lai snem ki long u Vice Captain u Phrangki Buam (Forward), Kharshong (Defender), Everbrightson Sana Mylliempdah (Forward), Gladdy Nelcen Kharbuli (Midfielder), Tremiki Lamurong (Midfielder). Katba kiwei pat kiba la bteng ïa ka kontrak kaba ar snem ki long u Siwel Rymbai (Goalkeeper), Kitboklang Khyriem (Defender) bad u Abhay Gurung (Midfielder).
Kine ki jingpynjlan ki pynpaw ïa ka jingthmu kaba jngai jong ka klob ban tei ïa lawei ki rangïalehkai ka Jylla bad ka thaiñ hi baroh kawei. Manla uwei pa uwei u rangïalehkai u la lah ban pyni ïa ka mynsiem ïalehkai ha madan ïalehkai.
Kane ka klob ka la pynleit jingmut ruh ha ka youth development bad ban plie lad ki nongïalehkai ka Jylla khnang ban pynthikna ba ki khynnah ïalehkai ka Jylla kin ïoh ka lad ban shim bynta ha ki lympung ïalehkai kiba heh ha ka ri.
U Managing Director ka SLFC, u Bah Larsing L.D Sawyan u la ong, “Ngi sngewkmen ban pynjlan ïa ka jingïateh bad ki 8 ngut ki rangïalehkai, 7 ngut na ki, ki dei kiba la lah ban sei na ka shlem ai jinghikai jong ka SLFC.
Kane ka pyni ïa ka jingangnud jong ka klob ban pynthikna ïa ka jingïashim bynta kaba khlaiñ bad kaba neh ha ka Indian Football League na ka bynta ka aïom ka ban wan.
“Mynta u snem 2 ngut ki nongïalehkai jong ngi kin ïasoi bad ki kynhun ISL. Hynrei ngi la pyrshang katba lah ban bat ïa kiwei pat ki dkhot jong ka kynhun bad ki sngewkmen ba baroh arngut u kapten bad u Vice Captain jong ka kynhun ki la pynjlan ïa ka kontrak jong ki.
“Te kumta ngi la khmih lynti ban soi ïa ki rangïalehkai ba thymmai na ka bynta ban pynmih bujli ha kaja kitei ki ar ngut ki rangïalehkai kiba ngi la duh noh bad shen ngin sa pynbna ïa ki,” u la bynrap.
