Shillong, Naitung 02
Ki nongkyrshan jong ka England ki la khmih lynti ban leit sha ka jingïalehkai pre-quarter final jong ka World Cup bad ka Mexico ki hap ban siew haduh £2,600 na ka bynta kawei ka tiket hadien ba ka FIFA ka la die biang ïa ki.
Ka England ka la buh ïa ka tarik na ka bynta ka jingïakhun pyrshah ïa ka Mexico ka ban long ha ka 6 tarik mynta u bnai, hadien ba ka la jop da 2-1 kol ïa ka DR Congo ha ka sngi Balang.
Ki jingïalehkai ha ka nongbah Mexico ki la pynlong ïa ka jingdie kaba heh duh ïa ki tiket, ryngkat bad ka jingduna ka jingpynbiang ha baroh kawei ka lympung, ha kaba ki nongkyrshan jong ka ri Mexico ki la thrang ban sakhi ïa katei ka jingïalehkai.
Hashwa ka jingpynïakap ha u Nohprah, ka England Supporters’ Travel Club ka la ai bhah mar 4 hajar tylli ki tiket na ka bynta ka jingïalehkai ha madan kaba lah ban ngiam haduh 80,824 ngut hapoh ka stadium.
Baroh la die ha u Kyllalyngkot bad ym don shu ki tiket kiba la pynmih da ka FIFA kumta ki la die biang ïa kitei ki tiket khnang ban ailad ïa ki paidbah ba kin ïoh ban sakhi ïa katei ka jingïalehkai.
Hashwa ba ka jingïakhun jong ka England pyrshah ïa ka DR Congo kan sdang tang 250 tylli ki tiket la buh kyrteng, kiba la kiew khyndiat hadien ka jingïalehkai sha ka 273 tylli. Hynrei ha ka shi miet ka jingkheiñ ka la kiew sha ka 429 tylli.
Ka tiket kaba duna dor tam na ka bynta uwei u nongkyrshan ka shongdor $295 (£224) hynrei ka la kiew sha ka $3,000 (£2,280). Da kaba buh ïa ka bai thied jong ka Fifa ha jrong, hynrei ka dor ka long £2,622 kaba pyni ïa ka jingkiew kaba haduh 12 sien na ka dor ba la buh.
Baroh ki don 63 tylli ki tiket ha ki lai tylli ki kyrdan jong ki nongkyrshan kiba la paw. Ym pat lah ban tip lada kine ki shuki ki dei shi bynta na ka bhah ba la die sha ka England Supporters’ Travel Club.
Ha ka kyrdan kaba saw, kaba rem dor tam ha ka dor jong ka tiket ka long $170 (£129), ka dor baroh jong ka tiket ka wan ka long $5,175 (£3,933) kaba long haduh 30 shah ïa ka dor jong ka.
Ka tiket jong ka kyrdan kaba lai, kaba ka dor tynrai jong ka ka long $350 (£266), la buh ha ka dor $3,600 (£2,736). Hadien ka bai thied jong ka FIFA kaba long $450 (£342) ka jingsiew ka long $4,140 (£3,146).
