Guwahati, Naitung:
Kum shi bynta jong ka jingthmu jong ka Military-Civil Fusion kaba dang ïaid shakhmat, ka Red Shield Division hapoh ka jingïalam jong ka Spear Corps ka la pynlong ïa ka Security Conference ha Laipuli ha ka sngi Ba-ar, kum ka jingpynkhreh ïa ka jingrakhe ïa ka Independence Day.
Ïa kane ka jingïalang la khot da ka jingthmu ban pynkhlaiñ ïa ka jingïatreilang hapdeng ki tnad bad ban bishar bniah ïa ka rukom pahara baroh kawei ban pynthikna ïa ka jingpynïaid ïa ka sngi rakhe jinglaitluid kaba suk bad kaba ïaid beit ha kylleng ka thaiñ.
Ha kane ka jingïalang la leit ban ïashim bynta da ki heh shipai ha ryngkat ki nongmihkhmat jong ki pulit ka Assam, kynthup ïa u Senior Superintendent of Police (SSP), Tinsukia bad Dibrugarh.
Ha ki jingïamir jingmut, ki nongïashim bynta ki la pynleit jingmut ha kaba pynbha ïa ki lad jingïasam jingtip, pyntreikam ïa ki lad jingïada ba ïatreilang, pynkiew ïa ka jingthmu ba stet jong ka jingïada bad pynbha ïa ka jingïatreilang hapdeng ki tnad ban jubab bha ïa ki jingeh kiba mih ha ka liang ka jingïada.
Ki heh sorkar ki la bishar bniah ruh ïa ki lad pynkhreh kiba la don lypa bad ki la ïakren ïa ki rukom treikam ba ïatreilang kiba thmu ban pynthikna ïa ka jingïasam jingtip ha ka por kaba biang bad ka jinglah ban jubab kaba biang ha ka por ba pynlong ïa ki jingrakhe jong ka ri.
Ka jingïalang ka la kut ha kaba baroh ki nongshim bynta ki la pynskhem biang ïa ka jingkular jong ki ban ïatreilang khlem jingeh bad ka rukom treikam kaba ïatylli ban pynthikna ïa ka sngi laitluid kaba shngaiñ, bad kaba khlem wanrah kano kano ka jingjia basngewsih.
Kane ka jingthmu ka pyni ïa ka jingpyrshang ba bteng jong ki shipai India ban pynkhlaiñ ïa ka jingpynïasoh hapdeng ki shipai bad ki riew paidbah.
