Imphal, Naitung:
Ha ka jingpyntreikam kaba jur pyrshah ïa ka jingkhaïi drok, ka kynhun ba ïatreilang jong ki bor pahara ka la kem ïa arngut ki briew kynthup ïa kawei ka kynthei bad kurup ruh ïa 530 gram u drok Brown Sugar ha T. Khullen Naka Checkpoint ha Senapati distrik jong ka Manipur.
Ïa kane ka jingkhynra la pynlong ha ka 29 tarik u Jylliew, 2026, ha ka por kumba 8:00 a.m., ha ka jingkhynra ba man ka sngi ba la pynlong da ki briew na ka Special Operation Team (SOT) jong ki pulit ka Senapati, ka Senapati Women Police Station, ka D-78 Battalion CRPFAT9 Team jong ka Quick Action Team (QAT) of B-109 CRPF.
Ha kane ka jingkhynra, kane ka kynhun ka la bat ïa kawei ka kali Tata Yodha (registration number MN06LA-3305) bad ki la pynlong ruh ïa ka jingtalasi kaba bniah. Ki heh sorkar ki la ïoh kurup ïa 42 tylli ki song sabon kiba don ïa ka jingsuba ba dei u drok brown sugar uba don ka jingkhia kumba 530 gram, kynthup ïa ka jingkhia jong ka plastik kaba la song.
Ïa kiba shong ha katei ka kali la shimti noh bad la tip kyrteng ïa ki kum u Helkho Kipgen (45) u khun jong u Paolal Kipgen uba dei u nongshong shnong jong ka shnong Keithelmanbi bad ka Hatneilhing Kipgen (40) ka kurim jong u Tongsei Kipgen na ka shnong Hengbung. Baroh arngut ki dei ki nongshong shnong jong ka Kangpokpi distrik.
Nalor kitei ki jingdih pynbuaid, ki pulit ki la kurup ruh ïa ka kali Tata Yodha, u Ignition key, ka byrni, ar tylli ki mobile phone, kawei ka Aadhaar card, bad kawei ka pla pisa kynthei kaba don T. 5,000.
Ha kaba ïadei bad kane ka jingjia, ka la don ka jingmudui mukotduma ha Senapati Police Station, bad ka jingtohkit kaba kham bniah ka dang ïaid shakhmat ban lap ïa ka tynrai jong katei ka jingkhaïi drok bad ban lap ïa kiwei pat kiba don jingïadei bad ka kynhun khaïi drok ba la shah kynnoh.
Ha kawei ka khubor ba kyrpang, ki pulit ka Senapati ki la ïoh ban kurup ar tylli ki mobile phone kiba la jah kata kawei ka Oppo A5 bad kawei ka Nothing 2a 5G bad ki la pynphai biang sha ki trai ba dei hok jong ki. Ïa kine ki handset, kiba la ïathuh ba ki la jah lyngba ki General Diary (GD) entries ha Senapati Police Station, la lapdien da ka jingïarap ba stad na u Sub-Divisional Police Officer (SDPO) bad ki pulit shwa ban aiti sha ki trai ha ka lah sngi U Blei. Ka jingïoh kurup ka pyni ïa ka jingpyrshang jong ki pulit ban ïarap ïa ki paidbah ryngkat bad ki kam pynjari aiñ jong ki.
