Shillong, Naitung 02
Ka Lapalang SC bad ka Sanmer SC ki la khur jingjop ha ka lympung ïalehkai SRGT 3rd Division Football League 2026 ba la pynïaid da ka Shillong Sports Association ha ka sngi Palei ha SSA Stadium kaba ha Polo.
Ha ka jingïakhun kaba nyngkong, ka Lapalang SC ka la pynliem noh ïa ka Umpling SC da 2-1 kol. Kane ka nam jop ka la wan urlong lyngba ki kol ba la thep da u Sending Roi Rngaid ha ka minit kaba 10 bad kawei pat da u Leginthang Changloi (34), hynrei ka Umpling ka la lah ban pynphai kylla shi kol na ka daw ka jingbakla u rangïalehkai ka Lapalang u Aibok Brandon Myrthong (27) hashwa ba kan shah rem.
Haba phai sha kawei pat ka jingïakhun kaba ar, ka Sanmer SC ka la jop da 1-0 kol ïa ka Lumparing SC bad kane ka la wan urlong lyngba ka shi kol ba la thep da u Shanbor Thongni ha ka minit kaba 7.
Na ka liang ki bor pynïaid ki la pynbna ba ka jingïakhun pre-quarter final jong ka U-20 4th Division Football League 2026 ha ka sngi Thohdieng kan long hapdeng ka Ïaitylli SC pyrshah ïa ka Them Rangshken SC ha ka por 1 baje mynsngi bad ka New Challenger FC ïa ka Golflink SC ha ka por 4 baje nohphai sngi.
