Shillong, Naitung 02
Ka St. Mary’s HSS ka la jam sha ka semi final ha ka Under-17 Girls jong ka lympung ïalehkai District Level Subroto Mukherjee Cup Inter School Football Tournament 2026 ba la pynïaid da ka shlem treikam u District Sports Officer (DSO) East Khasi Hills.
Kane ka jinglah ban pynthikna ka la wan hadien ba ka la lah ban pynliem noh ïa ka Shillong Vidyalaya da 3-0 kol ha ka sngi Palei ha madan Heh Mini Stadium kaba ha Mawlai Phudmuri.
Kumba ka paw ha kane ka kyrdan ïalehkai jong ki kynthei ki la don tang san tylli ki kynhun kiba la wan shim bynta ha kaba kat kum ka prokram ïa ka Sacred Heart Boys, Ïewrynghep HSS bad ka Tyrsad la pynrung lypa sha ka semi final, katba ka St. Mary’s bad ka Shillong Vidyalaya ki la hap ban ïakhun pyrshah.
Ha katei ka jingïakhun ka St. Mary’s ka la ïoh ei shi kol na ka daw ka jingbakla thep hi da ka ‘thei ïalehkai ka Shillong Vidyalaya ka Angela Myria ha ka minit kaba 12. Te kumta hadien kane ka St. Mary’s ka la ïoh ban thep sa ar kol lyngba ka Grace Shangpliang (29) bad ka Azariah Ryntathiang (41) na ka bynta ban khur syndon ïa ka jingjop.
Te kumta ka jingïakhun semi final jong kane ka kyrdan kan long hapdeng ka Sacred Heart Boys pyrshah ïa ka Ïewrynghep HSS ha ka por 10 baje mynstep bad ka Tyrsad HSS ïa ka St. Mary’s ha ka por 11:30 mynstep.
Ha ka jingïakhun jong ka kyrdan ïalehkai U-17 boys, ka O. M. Roy Memorial H.S.S ka la pynliem noh ïa ka St. Anthony’s H.S.S da 4-0 kol. Ïa kine la thep da u Lamshai Jana ha ka minit kaba 18, kumjuh u Banaijingshai Kharkongor (48), Ebenezer Sun (55) bad u Jonathan Kharbani (56).
Ka H.Elias Memorial ka la shah rem noh ha ka Shillong College da 0-2 kol kaba la wan lyngba ki kol ba la thep da u Rebuiltstar Langstieh ha ka minit kaba 8 bad ka Arthaios Jana (57).
Ka Umpohliew Jingtip ka la jop da 2-0 kol ïa ka Umphyrnai Presbyterian. Ïa kine la thep da u Shatbor Jana ha ka minit kaba 27 bad u Adrian Nongkhlaw (31).
Ka Sacred Heart Boys ka la pynliem noh ïa ka Don Bosco H.S.S. Smit da 5-0 kol. U Dakihi Hadem u la khur ïa ka hat-trick hadien ba u la ïoh ban thep ha ka minit kaba 2, 45 & 60 bad ïa kiwei pat la thep da u Newstar Daju (37 & 49).
Haba phai sha ka U-15 Boys, ka Umpohliew Jingtip ka la pynliem noh ïa ka Umphyrnai Presbyterian S.S lyngba ka shi kol ba la thep da u Mingstar Lyngdoh ha ka minit kaba 15.
Ka Sacred Heart Boys ka la jop da 4-3 kol ïa ka Don Bosco H.S.S.Smit. Na ka Sacred Heart la thep da u Kyrsiewlang Tangsang, Banshanskhem Wanñiang, Pillarson Thongni bad u Tosanbha P. Syngai, katba na ka Don Bosco la thep da u Alden Darren Khongsit, Shaniahskhem Nongkhlaw bad u Tosanbha P. Syngai.
Ka St. Anthony’s ka la pynliem noh ïa ka Ïewrynghep SS da 7-2 kol. U Henrick Kupar Kurbah u la khur ia ka hat-trick hadien ba u la ïoh ban thep ha ka minit kaba 6, 15 & 25. Ïa ki ar kol la thep da u Bameker Pyngrope (32 & 34), katba ïa kiwei pat la thep da u R.Nathan Vanlalpekhlua (3) bad u Shaiban.C. Sohshang (22). Na ka liang ka Ïewrynghep la thep da u Mewanshan Wanroi (13) bad u Lifarson Thawmuit (18).
Ha kawei pat ka jingïalehkai kaba khatduh, ka O.M Roy Memorial ka la pynliem noh ïa ka Shillong Vidyalaya lyngba ka shi kol ba la thep da u Shiborlang Dkhar ha ka minit kaba 49.
