Guwahati, Naitung:
Ki pulit ki la leh katkum ki jingtip ba kyrpang shwa ban bat ia katei ka kali ha Six Mile ka kali kaba la shah bat ka don ïa u nombar UP-35BV-8240, la ïathuh ki pulit da kaba shai.Kiba shah kem la ithuh ba ki dei ki nongshong shnong jong ka distrik Unnao bad Kanpur
Ki pulit hadien ba ki la ïoh ïa ka jingtip kaba bniah, ki la pynlong ïa ka jingleit khynra kaba jur bad ïoh ban kem ïa lai ngut ki briew bad ïoh ban kurup ïa ki pisa thok Fake Indian Currency Notes (FICN) kiba shongdor T.10.9 lak na kawei ka kali kaba la shah bat ha Six Mile ha surok Panjabari ha Guwahati.
Khlem da pynslem hadien ba la ïoh jingtip kaba bniah, ki pulit ki la bat ïa kawei ka kali kaba don ïa u nombar UP-35BV-8240 bad ki la kem ïa lai ngut kiba shong ha ka.
Kine kiba la shah kynnoh ki dei kiba la tip kyrteng kum u Anuj Gupta (34) na Unnao District, u Mahesh Shukla (32) na Kanpur District bad ka Roshan Gupta (28) na Kanpur District bad baroh ki dei ki nongshong shnong jong ka Uttar Pradesh.
Ha ka jingtalasi ïa katei ka kali, ki pulit ki la ïoh kurup ïa ka pisa India thok kaba kot sha ka 10.9 lak tyngka, baroh ki dei ha ki lut 500 tyngka.
Nalor katei ka pisa thok, ki ophisar ki la kurup ruh ïa ka Gas Cutter bad ka Gas Cylinder, ka dao, ka Gold Flame Lighter, bad ka Cutting Plier na ka kali.
Ki pulit ki la sdang ïa ka jingtohkit katkum ki kyndon aiñ, bad ka jingtohkit ka dang ïaid shakhmat ban lap ïa ka tynrai jong katei ka pisa thok bad ban lap ïa kano kano ka kynhun kaba kham heh kaba ïadei bad kane ka kam thok.
