Guwahati, Naitung:
Kumba la buh jingkheiñ, la ong ba kin don 12 tylli ki district ha Assam kiba lah ban mad ïa ka jingktah jong u slap uba lah ban wan khlem poi pyrkhat na ki jingkylla jong ki um duriaw kum ka El Nino, ka sorkar pdeng ha ka sngi Balang ka la pynthikna ban kyrshan pura ïa ka Assam bad Arunachal Pradesh ha kaba ïakhun ïa ka jingeh na ka jingshlei um kaba dang ïaid shakhmat bad ban tei bad pynbha pat ïa ki jingtei kiba la shah pynjulor.
Kane ka jingpynthikna ka la wan ha ka jingïalang jong ka Assam Flood Review Meeting kaba la long ha Lok Seva Bhawan, Dispur, kaba la pynïaid lang da u Myntri ka Agriculture & Farmers’ Welfare and Rural Development jong ka sorkar pdeng u Shivraj Singh Chouhan bad u Myntri ka Parliamentary Affairs bad Minority Affairs jong ka sorkar pdeng u Kiren Rijiju.
Ha kane ka jingïalang la don lang ruh ki Myntri jong ka Cabinet ha Assam bad ki heh sorkar ka jylla.
Ka jinglong jingman ha kaba ïadei bad ka jingshlei um ha Arunachal Pradesh ka la nang sniew shuh shuh kumba ka long ha ka 30 tarik, Jylliew, ha kaba ka jingïap jong ki briew ka la kiew sha ka saw ngut, katba palat 90,000 ngut ki nongshong shnong ki la shah ktah ha kylleng ki 28 tylli ki distrik jong ka jylla hadien shi taïew jong u slap khlem sangeh, ka jingshlei um bad ka jingtwa khyndew.
Katkum ka jingkheiñ jong ka State Emergency Operation Centre (SEOC), 90,499 ngut ki briew ha ki 251 tylli ki shnong kiba saphriang ha ki 202 tylli ki jaka synshar ki la shah ktah naduh ka 24 tarik, Jylliew.
Ka jingïap briew kaba dang shen ka dei na ka shnong Sarti ha Anjaw distrik, ha kaba uwei u briew u la khlad noh na ka jingtwa khyndew ha ka 28 tarik u Jylliew bad ïa katei ka jingjia la pyntip sha ki bor pynïaid kham hadien. Lai ngut kiwei pat ki briew kham hashwa ki la duh noh ïa la ka jong ka jingim ha ka jingshlei um kaba shyrkhei kaba la lynshop ïa ka shnong Possa ha Keyi Panyor distrik ha ka 24 tarik, tarik, Jylliew.
Ka SEOC ka la ïathuh ruh ba ki don 21 ngut ki briew kiba la mynsaw ha katei ka jingshah lynshop ka Keyi Panyor, katba arngut ki kynthei ki dang jah rngai.
Ka Upper Siang distrik ka la paw kum ka distrik kaba la shah ktah bha, ha kaba ki briew kiba la shah ktah ki long 47,357 ngut bad bud sa Siang (23,715), Kra Daadi (8,171) bad ka East Kameng (5,895).
U Myntri Rangbah ka jylla u Pema Khandu, ryngkat u Myntri ba dei khmih ha ka rep ka riang jong ka sorkar pdeng u Shivraj Singh Chouhan bad u Myntri ka Parliamentary Affairs jong ka sorkar pdeng u Kiren Rijiju, ki la pynlong ïa ka jingpeit bniah na suiñ bad na khyndew ïa ka distrik Keyi Panyor kaba la shah pynjulor ha ka jingshlei um ha ka shisngi ban bishar bniah ïa ka jingjur jong ka jingshah pynjulor na kane ka jingshlei um bad ka jingpynkhreh ban ai jingïarap ka dang ïaid shakhmat.
Haba kren sha ki lad pathai khubor hadien ba la wai ka jingïalang, u Chouhan u la ong ba ka sorkar pdeng ka la bishar bniah ïa ka jinglong jingman jong ka jingshlei um ha baroh ar tylli ki Assam bad Arunachal Pradesh, ha kaba u slap Lyiur uba bteng u la wanrah ïa ka jingpynjot kaba jur.
