Shillong, Naitung 02
U rangïalehkai shapdeng ka Senegal, u Pape Gueye, u ong ba un sangeh shipor ban ïalehkai na ka bynta ka ri jong u, katba ki nongpynïaid ba mynta ki dangbat ïa katei ka kam.
Kane ka rai jong une u rangïalehkai ba dang 27 snem ka rta ka long hadien ba ka Senegal kaba la ïalam da u Pape Thiaw kum u Manager ka la shah rem da 2-0 kol ha ka Belgium ha ka jingïakhun ka wat kaba ar ne ka round of 32 ha ka World Cup.
U Habib Diarra bad u Ismaila Sarr ki la ïoh ban thep kol kham hashwa na ka bynta ka Senegal hashwa ba u Romelu Lukaku bad u Youri Tielemans kin pynïakhaid bad ban pynlong ïa ka jingïalehkai ba bteng shaduh ka ‘extra time’.
Hynrei dei ha ka minity kaba 125 jong ka ‘extra time’ ba ka Belgium ka la ïoh ïa ka kabu kaba biang lyngba ka penalty bad u Tielemans um shym la pynlehnohei ïa kane ka kabu ksiar bad ban pynlong ïa ka Senegal ba kan leit phai ïing noh.
U Gueye, uba ïalehkai na ka Villarreal ha ka lympung La Liga ha Spain, u la sdang ïa ka jingïalehkai hynrei u la shah pynshong noh na ka bynta ban pynmih bujli noh da u Lamine Camara hadien 66 minit.
“Ngan sa wan biang ban ong katto katne ki kyntien halor ka jingshah rem, hynrei nga pynbna mynta ka sngi ba katba ki bor pynïaid ki dangdon ha kane ka kynhun, ngan shongthait shwa na kane ka kynhun,” la ong u Gueye, uba la ïalehkai 45 sien na ka bynta ka Senegal bad thep ar kol ha ka jingïalehkai group pyrshah ïa ka Iraq.
Kumba ka paw u Thiaw u la shimti kum u coach ïa ka Senegal naduh u Nohprah jong u snem 2024 bad ka la don ka kynrum kynram kaba la mih ha kaba kane ka kynhun kam shym la ïoh ban rah ïa ka Africa Cup of Nations 2025.
U Thiaw u la pynmih noh ïa ka kynhun jong u na madan haba ka Morocco ka la ïoh da ka penalty ha ka jingïakhun phainal jong ka Afcon ha u Kyllalyngkot.
Ha kaba kut ki rangïalehkai ki la wanphai biang hadien ba ki la pynslem kumba 17 minit eiei hashwa ba ïa ka Brahim Diaz la ïoh kem bad u Gueye u la thep ïa ka kol ha ka extra-time.
Hynrei ïa ka Morocco la rai kum ka lahduh ha katei ka lympung kaba la kut ha u Lber hadien ba ka Confederation of African Football (Caf) ka la pynphai kylla ïa ka jingmih jong ka jingïakhun phainal hadien ba ka Senegal ka la mih na madan.
Te kumta ka Senegal ka la buh ka jingkyrpad ha ka Court of Arbitration for Sport bad ka la khmih lynti ba kan ïoh biang ïa katei ka nam.
