Shillong, Naitung 03
Ka lympung FIFA World Cup 2026 ka la bteng da ki jingïalehkai jong ka Round of 32 kiba itynnad ha ka 03 tarik Naitung 2026.
Kala long ka sngi kaba itynnad jong ka jingïalehkai phutbol ha kaba la ïohi ïa ki kynhun ïalehkai ba heh bha kiba la ïakhun tyngeh ban jam sha kawei pat ka bynta.
Ka Portugal ka la jop ha ka jingïalehkai pyrshah ïa ka Croatia da 2-1 kol ha madan ïalehkai Toronto Stadium ha ka 03 Naitung 2026 ban ïoh rung sha ka Round of 16 jong ka FIFA World Cup 2026.
Ka Croatia ka la thep kol nyngkong ha ka jingïalehkai kaba la ïakhun tyngeh ka ba poi haduh ka minit ba 53 lyngba u Ivan Periši?, da kaba kynjat ïa ka bol kaba la ïaid pyshah lyngba u Diogo Costa ban pynlong ïa ka Croatia ban lamkhmat da 1-0 kol. Hadien kata la bishar bniah bad pynthikna da ka VAR.
Ym slem u Ronaldo u la pynphai kylla da shi kol lyngba ka penalty ha ka minit kaba 68 hadien ka jingbunsien ka jingbujli ïa ki nongïalehkai bad ka jingbishar bniah lyngba ka VAR, ka Portugal ka la ïoh ïa ka penalty. U Cristiano Ronaldo u la shim ïa ka kabu ban pynïaryngkat na ka bynta ka Portugal.
U Gonçalo Ramos, u nongïalehkai ba bujli u la ïoh ban thep ïa ka kol ha ka minit kaba 4 lyngba ka por kaba la pynjlan (90+4), kaba la pynlong bad pynlah pat ïa ka Portugal ban rung sha ka kyrdan kaba bud.
Da kane ka jingjop, ka Portugal ka la ïaid sha ka Round of 16, ha kaba kan sa ïakhun pyrshah ïa ka Spain ha ka 07 Naitung, 2026, ha Dallas Stadium.
Ha kawei pat ka jingïalehkai ka Spain ka la jop noh ïa ka Austria da 3-0 kol ka jingïalehkai kaba la long ha madan Los Angeles Stadium, California
U Mikel Oyarzabal u la ïoh ban thep kol ha ka minit kaba 36, kaba la pynlong ïa ka Spain ban lam khmat ha ka kylla step.
Katba ha ka minit ba 66 u rangïalehkai ba shadien u Pedro Porro u la thep ïa ka kol ka ba ar na bynta ka Spain ha kaba sdang jong ka kylla miet.
Ha ka minit ba 89 u Oyarzabal u la thep biang sa kawei ka kol ka ban pynlong ia ka Spain ban jop da 3-0 kol.
Ha kawei pat ka jingïalehkai ha madan BC Place Vancouver, Canada ka Switzerland ka la pynliem noh ïa ka Algeria da 2-0 kol.
U Breel Embolo u la thep kol tang ha ka minit kaba 10 bad u Dan Ndoye ha ka minit kaba 46 ban pynlong ïa ka kynhun ban jop noh da 2-0 ïa ka Algeria.
