Jowai, Naitung 03
Ka North Liberty Higher Secondary School, Jowai bad Amwi Higher Secondary School, Thangbuli kidei ki ar tylli ki skul kiba la ïoh ban rah ïa ka nam lahduh jong ka District Level Inter School Subroto Mukherjee Cup Football Tournament 2026 ba la pynïaid da ka ophis District Sports Officer, West Jaintia Hills.
Baroh lai tylli ki jingïakhun final la pynlong ha madan Wahiajer Multi Sports Complex ha ka 03 tarik Naitung 2026.
Ki rang bad ki thei ïalehkai ka North Liberty Higher Secondary School, Jowai ki la ïohrah ïa ka nam lahduh ha ka kyrdan Under-15 Boys bad kyrdan Under-17 Girls. Katba ka Amwi Higher Secondary School, Thangbuli ka la ïohrah ïa ka nam lahduh ha ka kyrdan Under-17 Boys.
Haba phai sha ka jingïalehkai phainal ha ka kyrdan Under-15 Boys, ka North Liberty Higher Secondary School, Jowai ka la lah ban pynliem ïa ka Jowai Govt. Boys Higher Secondary School da 1-0 kol.
Ha ka kyrdan Under-17 jong ki kynthei ka North Liberty Higher Secondary School, Jowai ka la pynrem ïa ka HK. Singh Memorial Secondary School da 5-0 kol.
Katba ha ka liang ki shynrang ka Amwi Higher Secondary School, Thangbuli ka la jop ïa ka Sawlyngdoh Higher Secondary School, Mowkaiaw da 1-0 kol.
Kumta da kane ka nam jop kine ki artylli ki skul kin mihkhmat ïa ka District sha ka State Level Football Tournament ka ban sa pynlong shen ha nongbah Shillong.
Ïa ki khusnam la sam da u kongsan Ma Kyntu Shullai MCS, Assistant Commissioner West Jaintia Hills District ha ka jingdonlang ka District Sport Officer (DSO), West Jaintia Hills ka Kong Linza F. Syiem, ki nongïalam bad dkhot nongkitkam ka WJDSA kumjuh ki nongialam shnong ka Wahïajer nalor kiwei-kiwei.
