Khliehriat, Naitung 03
Ka Step by Step Secondary School ha ka kyrdan Under-15 Boys, ka Wapung Higher Secondary School ha ka Under 17 Boys Lotus Secondary School ha ka Under 17 Girls ki la long ki lahduh ha ka lympung ïalehkai District Level Inter-School Subroto Mukherjee Cup 2026 ba la pynïaid da ka ophis District Sport Officer (DSO), East Jaiñtia Hills.
Kane ka la wan hadien ka jingkhur nam jop ha ka jingïalehkai phainal kaba la long ha madan artificial turf kaba ha Dienchynrum, Khliehriat haka 03 tarik Naitung 2026.
Haba phai sha ka jingïalehkai phainal ka Step by Step Secondary School ka la pynrem ïa ka Musniang Secondary School da 1-0 kol.
Ka Wapung Higher Secondary School ka la jop ïa ka Sein Raij Tuber Higher Secondary School da 4-3 kol lyngba ka Tie-Breaker, katba ka Lotus Secondary School ka la pynliem ïa ka Khliehriat Higher Secondary School da 2-0 kol.
Ïa ka nam Best Goalkeeper ha ka kyrdan Under-15 Boys la ïoh da u Wanbanshan Lamare na ka Step by Step Secondary School, ha ka kyrdan Under-17 Boys la ïoh rah da u Redeemingson Phawa na Wapung Higher Secondary School katba ha ka kyrdan Under-17 Girls la ïoh da ka Haphisuk Lyngdoh na Lotus Secondary School.
Ïa ka nam Best Player ha ka kyrdan Under-15 Boys la ïoh da u Daowan Rymbai na Musniang Secondary School, ha ka kyrdan Under-17 Boys la ïoh da u Jefferson Phawa bad ha ka kyrdan Under-17 Girls la ïoh da ka Saphapaya Lyngdoh.
Ha kane ka sngi pynkut la don lang ruh u District School Education Officer (DSEO) ka East Jaiñtia Hills District Ma R. Diengdoh ka District Sports Officer (DSO) ka East Jaiñtia Hills District ka Kong S.M Rapsang, u District Public Relations Officer (DPRO), East Jaintia Hills District, Ma E.S. War nalor kiwei-kiwei.
Haba ai jingkren ha kane ka jingïalang, u District School Education Officer (DSEO), East Jaintia Hills District, Ma R. Diengdoh u la ai khublei ïa baroh ki kynhun kiba la jop na ka bynta ka jinglah ban ïalehkai bha, watla uwei u jop ne rem, ka bynta kaba kongsan tam jong kano-kano ka jingïakop ka dei ka jingïashim bynta bad ka jingshemphang kaba la ïoh lyngba jong ka.
Shuh shuh, u la ai mynsiem ruh ïa ki kynhun ki bym shym la lah ban pynthikna ïa ka jingjop mynta u snem ba kim dei ban duh jingkyrmen hynrei ban ïai trei shitom bad ïaleh ban ïoh ïa ki jingmih kiba kham bha ha ka samoi ban wan jong ka lympung bad u la kyntu ïa ki khynnah pule ba kin ïai bteng ban don ka jinglong ba pyrkhing, ban bat ïa ka mynsiem ïalehkai bad ban san kum ki dkhot kiba don ka jingkitkhlieh.
