Shillong, Naitung 05
Ka kynhun ki nongjngi na East Khasi Hills ka la khur ïa ka nam lahduh ha ka lympung ïakop jngi ba la tip kum ka 19th State Aquatic Championship 2026, kaba la poi sha kaba kut ha ka sngi Saitjaiñ ha pung Crinoline Shillong.
Ha kane ka jingïakop jngi kaba ar sngi kynthih ba la pynlong da ka Meghalaya Swimming Association (MSA), ka East Khasi Hills ka la khur 68 tylli ki takma ksiar, 61 tylli ki rupa bad 46 tylli ki rnong. Katba ka South West Khasi Hills ka la wan ha ka kyrdan ba-ar. Ïa ka nam Best Swimmer la khur da u Meïaipynsan L. Tron bad ka Verem Gedaliah Nongsiej ha ka liang ki shynrang bad ki kynthei. Katba ïa ka nam Promising Swimmer la ïoh da u Keanan Nongrum Momin bad ka Anisa Rakshit Phanbuh.
Ki don haduh 133 ngut ki nongjngi kiba ka wan na kylleng ki district ka Jylla kiba la wan shim bynta ha kane ka jingïakop ha kaba la phiah ha ki san tylli ki kyrdan kata ka Sub-Junior, Junior bad ka Open Category.
Ïa ki khusnam sha baroh ki nongjop la sam da u Deputy Director ka tnat ïalehkai u Bah Païa War Nongbri kum u kong-san ha ryngkat u Technical Director ka Meghalaya Boxing Association u Bah Larry Kharpran kum u symbud kongsan, ha ryngkat ka jingïadon lang ki dkhot ka Meghalaya Swimming Association bad kiwei kiwei.
