Shillong, Naitung 05
U Kylian Mbappe u la lah ban pynïaryngkat bad u Lionel Messi na ka bynta ban ïaknieh ïa ka khusnam Golden Boot ha ka lympung ïalehkai FIFA World Cup 2026, hadien ba u la lah ban thep kol ha ka pre-quarter final pyrshah ïa ka Paraguay ha ka sngi U Blei.
Ha kane ka jingïa-khun, u Mbappe u la ïoh ban thep kol lyngba ka penalty na ka bynta ban pynlong ïa ka France ban khur jingjop da 1-0 kol. Kane ka shi kol ka la kyntiew ïa ka jingthep kol jong u Mbappe sha ka 7 kol ha ki 5 tylli ki jingïalehkai na ka bynta ban ïasoh lang bad u Messi ha ka jinglah ban thep kol bun ha kane ka lympung mynta u snem.
Hynrei u Messi u la thep 7 kol ha ki 4 tylli ki jingïalehkai bad kaba khatduh eh ka jong u ka dei ha ka jingïalehkai ka wat kaba ar pyrshah ïa ka Cape Verde. Haba phai sha ki kol ba la thep ha ka World Cup, u Mbappe u la wan hadien ha kaba u la duna tang shi kol na u Messi da kaba thep 19 kol. U Harry Kane bad u Erling Haaland ki don lang ha ka kyrdan kaba lai da kaba thep mar 5 kol, katba u Ousmane Dem-bele, Mikel Oyarzabal, Ismaila Sarr bad u Vinicius Junior ki la thep mar 4 kol. Hynrei haba phai sha u Cristiano Ronaldo um shym la lah ban thep kol bun ha kaba u la thep tang 3 kol ha ki saw sien ïakhun.
U Mbappe, uba la lah ban thep 19 kol ha ki 19 tylli ki jingïakhun ha ka World Cup, u la lah ban thep kol ha ka minit kaba 70 ha kaba u rangapkol ka Paraguay, u Orlando Gill um shym la lah ban khanglad na kane ka jingshah thep. Utei u kapten ka France u la ïoh ïa ka penalty hadien ba u Diego Gomez u la ïoh jingsneng lyngba ka jingbishar bniah ïa ka durkhih.
“Nga la ong naduh ka sngi kaba nyngkong bad u don ïa ka mynsiem ïakhun bad u la lah ban pynurlong,” la pynpaw u coach ka France u Didier Des-champs hadien ba ka kynhun jong u ka la jop da 1-0. “U dei u rangïalehkai ba tbit bha ha madan. Hynrei haba u kren, u kren na ka bynta ka kynhun baroh kawei.”
