Shillong, Naitung 05
Ka Umpohliew Jingtip H.S.S, Tyrsad H.S.S bad ka O.M. Roy Memorial H.S.S ki la long ki lahduh ha ka District Level Subroto Mukherjee Cup Inter School Football Tournament 2026 ba la pynïaid da ka shlem treikam u District Sports Officer (DSO) East Khasi Hills.
Kine ki kynhun kin mihkhmat ïa kane ka disrict sha ka State Level Subroto Mukherjee Cup Inter School Football Tournament 2026, ka ban sa long shen ha kane ka nongbah.
Ha ka jingïakhun phainal jong ka U-15 ki shynrang, ka Umpohliew Jingtip ka la pynliem noh ïa ka St. Anthony’s H.S.S da 1-0 kol bad kane ka la wam urlong lyngba u Hamebanjop Langstieh ha ka minit kaba 50+1.
Kumjuh ha ka jingïakhun phainal jong ka U-1t ki kynthei, Tyrsad ka la lah ban pynliem noh ïa ka Ïewrynghep SS da 3-1 kol.
Ha kane ka jingïakhun, ki ‘thei ïalehkai ka Tyrsad ki la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba ka Deiphibakor Lyting ha ka minit kaba 21. Hadien shiteng kynta kane ka kynhun ka la thep biang ïa ka kol kaba ar lyngba ka Ha-I-Sha Myrthong (37) bad ïa ka kol kaba khatduh la thep da ka Labianghun Rani (42).
Hynrei ka Ïewrynghep ka la lah ban pynphai kylla shi kol lyngba ka Sarihun Songthiang ha ka minit kaba 57 hashwa ba kan mad ïa ka jingshah rem.
Haba phai sha kawei pat ka jingïakhun U-17 ki shynrang, ka O.M. Roy Memorial ka al pynliem noh ïa ka Umpohliew Jingtip H.S.S lyngba ka tie-breaker da 4-2 kol.
Hapdeng ka jingïakhun kine ki kynhun ki la ïathep mar ar kol. U Lamshai Jana u la the par kol na ka bynta ka OM Roy ha ka minit kaba 68 & 75, hynrei ka Umpohliew ka la ïoh ban thep lyngba u Richmond Lapang (10) bad u Ïaisynroplang Syiemlieh (78).
Ïa ki khusnam sha kine ki kynhun la sam da u President ka Meghalaya Football Association (MFA) u Bah Hamletson Dohling ryngkat u Vice President Bah Cliff Nongrum ha kaba la ïadon lang u DSO Bah Damang Syng-kon bad kiwei.
