Shillong, Naitung 06
U Neymar u la ong ba u la pyndep ïa ka jingïalehkai na ka bynta ka Brazil, ha kaba ka la pynlong ïa u ban pynbna ïa ka jingshongthait noh na ka World Cup, hadien ka jingshah rem da 2-1 kol ha ka Norway ha ka pre-quarter final.
“Nga la pyrshang katba lah,” la ong u Neymar hadien ba la kut ka jingïalehkai ha ka sngi U Blei. “ka la sdang hangne ha MetLife Stadium bad nga la pynkut hangne. Mynta ka la poi sha kaba kut.”
U Neymar, uba la 34 snem ka rta, u la ïalehkai nyngkong na ka bynta ka Brazil ha ka 10 tarik u Nailar jong u snem 2010 ha ka jingïalehkai paralok pyrshah ïa ka United States ha ka stadium kaba ha East Rutherford, New Jersey.
Une u khlur ïalehkai ba paw bad uba long u rangthep kol ba kynsai jong ka Brazil, u la ïoh ban thep kol nyngkong na ka bynta ka ri jong u hakhmat u Pele, u nongïalehkai phutbol ba paw ka pyrthei.
Ha ka jingïakhun pyrshah ïa ka Norway, u la ïoh ban thep kol lyngba ka penalty hashwa ban kut ka jingïalehkai hadien ba la ïoh mih madan kum u rangïalehkai shongben. U la jaw ummat hadien ba la pynkut ïa ka jingïalehkai bad la ïarap ban pyntngen ïa u da ki para nongïalehkai.
U Neymar u la mih madan tang ar tylli na ki phra tylli ki jingïalehkai jong ka Brazil ha kane ka lympung namar ka jingmynsaw ha ka kjat jong u. U la ïoh ban mih madan na ka bynta 15 minit pyrshah ïa ka Scotland ha ka jingïalehkai group.
Une u rangïalehkai ba kynsai jong ka Brazil la palat shiphew snem, u la ngat ha ki jingmynsaw ha kine ki snem ba la lah kiba la ktah ïa ka jingïalehkai jong u. Kumba ka paw kane ka ri ka donkam ban wanrah ka jingkylla da kaba ka donkam ban sei da kiwei pat ki rangïalehkai ki ban mih bujli ha ka jaka jong u.
“Ngi kyrpad ba ki paidbah kin don ka jingshaniah bad ka pateng kaba thymmai bad ban kyrshan ïa ki naduh kaba sdang,” ong u kapten kane ka kynhun u Marquinhos.
