Itanagar, Naitung:
U MP jong ka Rajya Sabha u Tai Tagak u la leit ban jngoh ïa ka Mothers Home-cum-Achukuru Children’s Home, ka jaka sumar ïa ki khynnah ba kyrduh bad kiba donkam jingïarap ha Ziro, bad u la pynthikna ban ai ka jingkyrshan ban pynkhlaiñ ïa ki jingpyntreikam jong kane ka jaka sumar ïa ki khynnah kiba ïakynduh jingeh na ki jingkyrduh.
Ha kane ka jingleit jngoh, u MP u la ïakren bad ki khynnah bad u la ai khublei ïa ka jingtrei jong ka nongseng ïa kane ka ïing, ka Talyang Shanti, da kaba ai khublei ïa ka jingaiti jong ka ban ai jaka sah, jingsumar bad jingkyrmen ïa ki khynnah kiba duk bad kiba kyrduh.
Kum shi bynta jong ka jingleit jngoh jong u, u Tagak u la noh synñiang T.1 lak sha katei ka jaka pule bad sam ïa ki tiar ba donkam, kynthup ïa ki jingthiah, ki jaiñ bad ki soh, na ka bynta ka jingbit jingbiang jong ki khynnah bad kiwei kiwei ki nongshong shnong.
U MP ka Rajya Sabha u la ïaroh ïa ki kam lehbha ba la leh da kane ka seng treimon sngewbha bad u la pynthikna ïa ki jingïarap baroh kiba lah na ka sorkar ban kyrshan ïa ka jingthmu jong ka.
Haba pdiang ïa ki jingeh ba ka jaka pule ka ïakynduh, u Tagak u la pynthikna ruh ba un pyrshang ban weng ïa ki jingeh ha ka jingïadei bad ki surok kiba ktah ïa ka ïing ki khynnah, da kaba pynpaw ba ka jingïoh lad kaba kham bha kan pynbha ïa ka jinglong jingman jong ki khynnah bad kan pynsuk ïa ka jingtreikam kaba ïaid beit jong ka jaka pule.
