Shillong, Naitung 06
U President ka America, u Donald Trump, u ong ba ma u hi dalade, ula kyntu ïa u President ka FIFA, u Gianni Infantino, ba un bishar bniah ïa ka red card bad ka jingshah sospon na ka bynta kawei ka jingïalehkai, kaba la ai ïa u rangïalehkai jong ka USA, u Folarin Balogun, bad kane ka la pynlong ka jingïatainia kaba jur ha ka FIFA World Cup, kaba dangïaid mynta.
Te kumta hadien ka FIFA ka la pynbna ba u Balogun u lah ban ïalehkai ha ka pre-quarter final pyrshah ïa ka Belgium hadien ba la weng noh ïa ka jingshah sospon bad kane ka la wanrah ka jingïatainia kaba jur bad kaba la buh jingkylli halor ka jinglong hok jong kane ka lympung.
“Kaei kaba nga la kyntu ka long ban bishar bniah. Ngam shym la ong, ‘Phi hap ban leh ïa kane,'” la pynpaw u Trump da kaba bynrap ba “um shym la pyrkhat ba ka dei ka jingleh bakla.”
“Ngam shym la ong ïa u ïa kaei kaba un leh, ngam lah ban ong ïa u ïa kaei kaba un leh,” u la bynrap ba ka komiti kaba laitluid “ka la shim ïa ka rai kaba dei.”
Kumba ka paw u Balogun, uba dei u rangthep kol ka America ha kaba u la thep 4 kol ha kane ka lympung, u la shah sei da ka red card hadien ba u la ïuh da ka boot ïa ka kjat jong u Tarik Muharemovic jong ka Bosnia-Herzegovina ha kaba ka la jop da 2-0 kol ha ka wat kaba ar bad kane ka la pynlong ïa u ba un duh ïalehkai na ka bynta kawei ka jingïalehkai ka ban wan.
Hynrei na ka liang ka FIFA ha ka sngi U Blei ka la pynbna ba ka la weng noh ïa ka jingshah sospon jong u na ka bynta ka jingïalehkai pre-quarter final, kaba la pynbitar ïa ka kynhun ïalehkai jong ka Belgium.
