Shillong, Naitung 06
Ka lympung ïalehkai siat suloi kaba hynriew sngi ba la tip kum ka 11th Meghalaya State Shooting Championship 2026 ka la poi sha kaba kut ha ka 5 tarik mynta u bnai ha Assam Regimental Centre, Shillong.
Ha kane ka lympung la wan shim bynta da ki nongïalehkai na kylleng ka Jylla bad kaba long shim bynta ka jingpynkhreh na ka bynta ka 39th National Games 2027 ka ban long ha kane ka Jylla. Te kumta kane ka lympung ka long ka rynsan na ka bynta ki nongïalehkai ba kin pyni ïa ki sap bad ki jingtbit jong ki ha kane ka jingïalehkai khnang ba kin nanglah ban pynjanai hashwa ban sdang ka National Games.
Ki la don 128 ngut ki nongïalehkai kiba la wan shim bynta ha kane ka lympung kaba la neh hynriew sngi kynthih ki long na ki hynriew tylli ki district kata na East Khasi Hills, West Khasi Hills, East Jaiñtia Hills, West Jaiñtia Hills, North Garo Hills bad ka West Garo Hills.
U nongsiat suloi uba kham rangbah tam ha kane ka lympung u dei u Bah John F. Kharshiing (64 snem) ha kaba u la shim bynta ha ka Sr. Masters – Pistol 25M, katba u nongïalehkai ba dangkhynnah tam u dei u KerdaiaiSyiemlieh (12 snem) uba la shim bynta ha ka Air Rifle 10M.
U President ka Shooting Association of Meghalaya u Bah John F. Kharshiing u la pynpaw ba kane ka lympung ka long ban kyntiew ïa kane ka jingïalehkai na ka bynta ka Jylla bad pynpaw ïa ka jingkyrmen halor ka jingpynkhreh jong ka Meghalaya na ka bynta ka National Games 2027.
Ha kawei pat ka liang u Dr. Vijay Kumar D, Commissioner & Secretary ka tnat ïalehkai ka sorkar Jylla, u la ïadon lang kum u Kongsan bad ban sam ruh ïa ki khusnam sha ki nongjop.
Ha ka jingkren jong u, u la pynpaw ïa ka jinglong ryntih, ka jingpyrkhat, bad ka jingskhem kum ki jinglong ban ai ka jingshakri ïa ki nongïalehkai ka Jylla. U la ïasam ruh ïa ka khubor ba sngewtynnat ba ka Sorkar Jylla ka la rai ban tei ïa ka jaka ïalehkai siat suloi ne ka Integrated Shooting Range ka ban long shi bynta ban kyntiew ïa ki nongïalehkai ka Jylla.
Ïa kane ka lympung la plie da u Commandant ka Assam Regimental Cen-tre, u Brig Vikas Rai Sha-dilya bad u Deputy Com-mandant, Col. Mahender Pde kum u kongsan bad symbud kongsan.
