Shillong, Naitung 06
Ka Golflink SC ka la jam sha ka semi final ha ka SSA U-20 4th Division Football League 2026, hadien ba ka la lah ban pynliem noh ïa ka Ïatylli SCC da 3-1 kol ha ka lah sngi U Blei.
Kane ka la wan urlong lyngba u Jilistin Warbah, Dibian Suting bad u Micky Makri.
Ha kane ka jingïakhun quarter final kaba la long ha SSA Stadium Polo, ka Golflink ka la pynkhih jar nyngkong eh lyngba u Jilistin ha ka minit kaba 9, hynrei hadien shiteng kynta u Kitbok Maskut (33) u la lah ban pynïakhaid kylla na ka bynta ka Ïatylli.
Ha ka kylla miet ka Golflink ka la ïoh ban ban thep biang sa ar kol lyngba u Dibian Suting (72) bad u Micky Makri (80) na ka bynta ban khur syndon ïa ka jingjop.
Haba phai sha ka 3rd Division, ka Lamlynti FC ka la pynliem noh ïa ka Lawmali SC da 2-0 kol. Ïa kine la thep da u Laban Taro ha ka minit kaba 55 bad u Wallam Kharumnuid (57).
Ha kawei pat ka jingïalehkai hapdeng ka Nongumlong SC bad ka Umphyrnai SC ki la ïakhaid mar 1-1 kol.
Ka Umphyrnai ka la pynkhih jar nyngkong lyngba u Arban Khongsngi ha ka minit kaba 38, hynrei u Tony Syngkli (40+1) u la pynphai kylla na ka bynta ka Nongumlong.
Ka jingïalehkai quarter final ha ka sngi Ba-ar kan long hapdeng ka Mawpdang SC pyrshah ïa ka Them Rangshken SC ha ka por 4 baje nohphai sngi ha SSA Stadium. Katba ha ka 3rd Division, ka Sanmer SC kan ïakynduh pyrshah ïa ka Mawkasiang SC bad ka Umpling SC ïa ka Rynjah SC.
